გვატემალაში სამართალდამცავებმა მიგრანტების წინააღმდეგ ცრემლსადენი გაზი და ხელკეტები გამოიყენეს, დაშავებული რამდენიმე ადამიანი
გვატემალის უსაფრთხოების ძალებმა ჰონდურასიდან აშშ-ისკენ მიმავალი მიგრანტთა დიდი ქარავანის შესაკავებლად ცრემლსადენი გაზი და ხელკეტები გამოიყენეს, – ამის შესახებ ინფორმაციას Reuters-ი ავრცელებს.
”გვატემალას გზავნილი ხმამაღალი და მკაფიოა: ამ ტიპის უკანონო მასობრივი გადაადგილებები მიუღებელია, ამიტომ ჩვენ ვმუშაობთ მეზობელ ქვეყნებთან ერთად, რომ ეს საკითხი მოგვარდეს”, – აღნიშნულია გვატემალას პრეზიდენტის ადმინისტრაციის მიერ გავრცელებულ განცხადებაში.
Reuters-ი წერს, რომ გასული კვირის პარასკევიდან გვატემალაში 7000-დან 8000-მდე მიგრანტი, მათ შორის მცირეწლოვან ბავშვებიანი ოჯახები, შევიდა, რომლებიც ჰონდურასიდან სიღარიბესა და ძალადობას გაურბიან.
გვატემალის მთავრობის მიერ გავრცელებულ ვიდეომასალაში ჩანს, როგორ ცდილობს ასობით მიგრანტი, უსაფრთხოების ძალების კორდონის გარღვევას და როგორ იგერიებენ მათ სამართალდამცავები ხელკეტებით. პოლიციამ მიგრანტების დასაშლელად ხმოვანი ხელყუმბარა და ცრემლსადენი გაზიც გამოიყენა. გვატემალას ხელისუფლების განცხადებით, დაშავებულია რამდენიმე ადამიანი.
მედიის ინფორმაციით, უკანდახეულმა მიგრანტების უმეტესობამ ახლომდებარე მთებს შეაფარა თავი.
