ნიდერლანდებში სამართალდამცავებმა „ლოქდაუნის“ წინააღმდეგ გამართული არასანქცირებული საპროტესტო აქციის 100-მდე მონაწილე დააკავეს

ნიდერლანდების დედაქალაქ ამსტერდამში ორიათასამდე მოქალაქემ კორონავირუსის გამო დაწესებული საყოველთაო „ლოქდაუნი“ გააპროტესტა, – ამის შესახებ ინფორმაციას Reuters-ი ავრცელებს.

სააგენტოს ცნობით, არასანქცირებული აქციის მონაწილეებს, რომლებიც რიკსმუზეუმისა და ვან გოგის მუზეუმის სამხატვრო გალერეების წინ მდებარე მოედანზე შეიკრიბნენ, ხელში ეკავათ ბანერები წარწერებით : „თავისუფლება : შეწყვიტეთ ბლოკადა“ და სკანდირებდნენ : „რა გვსურს? თავისუფლება!“.

აქციის არცერთ მონაწილეს პირბადე არ ეკეთა და არც სოციალური დისტანციის წესებს იცავდა. პოლიციამ დემონსტრანტებს დაშლისკენ მოუწოდა, თუმცა ისინი ამ მოთხოვნას არ დაემორჩილნენ და ზოგიერთმა სამართალდამცავების მიმართულებით პიროტექნიკაც კი ისროლა. ამის შემდეგ სპეცრაზმმა აქციის მონაწილეების წინააღმდეგ წყლის ჭავლი გამოიყენა და ასამდე მათგანი დააკავა.

ცნობისათვის, ნიდერლანდების მთავრობამ კორონავირუსით ინფიცირების შემთხვევების შესაჩერებლად დეკემბერში სკოლები და მაღაზიების უმეტესობა დახურა. რამდენიმე დღის წინ კი „ლოქდაუნი“ სამი კვირით გაახანგრძლივა.

ნიდერლანდებში, პანდემიის დაწყების დროიდან, ინფიცირების 900 000-ზე მეტი შემთხვევაა დადასტურებული, დაღუპულთა რაოდენობა 13 000-ს აჭარბებს.