ჰასან რუჰანი – ჩვენი ხალხი ვაქცინების მწარმოებელი კომპანიებისთვის “საცდელი მოწყობილობა” არ გახდება
უცხოურ კომპანიებს ნებას არ მივცემთ, კორონავირუსის საწინააღმდეგო ვაქცინები ირანელ ხალხზე გამოსცადონ, – Reuters-ისინფორმაციით, ამის შესახებ ირანის პრეზიდენტმა ჰასან რუჰანიმ განაცხადა. მისი თქმით, ირანელი ხალხი ვაქცინების მწარმოებელი კომპანიებისთვის „საცდელი მოწყობილობა“ არ გახდება.
„უცხოურ კომპანიებს სურდათ, ჩვენთვის ვაქცინები მოეწოდებინათ და ირანელ ხალხზე გამოგვეცადა, მაგრამ ჩვენმა ჯანდაცვის სამინისტრომ მათი განზრახვა აღკვეთა. ჩვენი ხალხი ვაქცინების მწარმოებელი კომპანიებისთვის საცდელი მოწყობილობა არ გახდება. ჩვენ უსაფრთხო უცხოურ ვაქცინებს შევიძენთ,“- განაცხადა ირანის პრეზიდენტმა.
შეგახსენებთ, გუშინ ირანის უზენაესმა ლიდერმა აიათოლა ალი ხამენეიმ განაცხადა, რომ მან ქვეყნის მთავრობას შეერთებული შტატებისა და ბრიტანეთიდან კორონავირუსის საწინააღმდეგო ვაქცინების იმპორტის აკრძალვა დაავალა.
„ირანში ამერიკული და ბრიტანული ვაქცინების იმპორტი იკრძალება. მე ეს ოფიციალურ პირებს უკვე განვუცხადე და ახლა საჯაროდ ვამბობ. მე მათ არ ვენდობი. ამერიკელებს რომ ვაქცინის შექმნა შეეძლოთ, საკუთარ ქვეყანაში კორონავირუსთან ბრძოლის კუთხით ასეთი ფიასკო არ ექნებოდათ”, – აღნიშნა აიათოლა ალი ხამენეიმ.
