ჯო ბაიდენი – აშშ-ის უსაფრთხოებისთვის უმნიშვნელოვანეს უწყებებს დონალდ ტრამპის ადმინისტრაციის ხელში დიდი ზიანი მიადგა
აშშ-ის არჩეული პრეზიდენტის, ჯო ბაიდენის თქმით, მისი გუნდი ხელისუფლების გადაბარების პროცესში დაბრკოლებებს აწყდება, ვინაიდან თავდაცვის დეპარტამენტისგან, ისევე როგორც მენეჯმენტისა და ბიუჯეტის დეპარტამენტისგან საჭირო ინფორმაციას ვერ იღებს.
„ვერ ვიღებთ იმ ინფორმაციას, რაც, ეროვნული უსაფრთხოების მნიშვნელოვან საკითხებთან დაკავშირებით წარმავალი ადმინისტრაციისგან გვჭირდება. ეს, ჩემი აზრით, დიდი უპასუხისმგებლობაა,“- განაცხადა ჯო ბაიდენმა.
მისივე თქმით, უწყებებს, რომლებიც აშშ-ის უსაფრთხოებისთვის უმნიშვნელოვანესები არიან, დონალდ ტრამპის ადმინისტრაციის პერიოდში “უზარმაზარი ზიანი” მიადგა.
„ბევრ იმ უწყებას, რომელიც აშშ-ის უსაფრთხოებისთვის უმნიშვნელოვანესია, უზარმაზარი ზიანი მიადგა. ბევრი მათგანი განადგურებულია პერსონალის კუთხით, ისევე როგორც მორალური და ქმედუნარიანობის თვალსაზრისით,” – აღნიშნა ბაიდენმა.
ჯო ბაიდენის ინაუგურაცია 20 იანვარსაა დაგეგმილი. დონალდ ტრამპი 3 ნოემბრის არჩევნებში საკუთარ მარცხსა და ბაიდენის გამარჯვებას ჯერ კიდევ არ აღიარებს.
