ანა ნაცვლიშვილი – ბნელ ოთახში, გაურკვეველ ვითარებაში, 20 ივნისის საქმეზე ამნისტირება ვერ მოხდება

ბნელ ოთახში, გაურკვეველ ვითარებაში, ასე 20 ივნისის საქმეზე ამნისტირება ვერ მოხდება. ვიცით, რომ მათ აქვთ უმრავლესობა და შეუძლიათ მიღება, მაგრამ ასე, ძალით მიღებული ამნისტია არასდროს, არცერთ საზოგადოებაში არ იწვევს დეპოლარიზებას, პირიქით, ის აჩენს ახალ იარებს, – ამის შესახებ ჟურნალისტებს ფრაქცია “ლელო-პარტნიორობა საქართველოსთვის” წევრმა ანა ნაცვლიშვილმა “ამნისტიის შესახებ” კანონპროექტთან დაკავშირებით მიმდინარე განხილვაზე განუცხადა.

მისივე თქმით, „ამნისტიის შესახებ” კანონპროექტი არის მიუღებელი და ის არ შეესაბამება შეთანხმებას.

„ეს პროექტი ასევე არ შეესაბამება ადამიანის უფლებათა ევროპულ სტანდარტებს. გუშინ ორი კომიტეტის განმავლობაში მიმდინარეობდა ცხარე განხილვა და ჩვენი მთვარი მოთხოვნა იყო შემდეგი – შევასრულოთ ევროპული შეთანხმება ევროპული სტანდარტის დაცვით. ის, რასაც “ოცნება” წარმოადგენს, არ არის შეთანხმების შესრულება ადამიანის უფლებათა ევროპული სტანდარტის დაცვით. გუშინ მათ შორის ჩვენ გვესწრებოდა 20 ივნისის ორი დაზარალებული. რეალობა არის ასეთი – 2 წლის განმავლობაში “ქართული ოცნების” პროკურატურამ მოახდინა დე ფაქტო ამნისტირება 20 ივნისის უმძიმესი დანაშაულების.

ჩემი წინადადება იყო ასეთი – შეჩერდეს კანონპროექტის განხილვა, ჩვენ უნდა მოვუსმინოთ დაზარალებულებს, სახალხო დამცველს, უნდა დავიბაროთ გენერალური პროკურორი, ჩვენ უნდა მოვუსმინოთ იმ ორგანიზაციებს, რომელთაც 20 ივნისის დარღვევები დოკუმენტირებული აქვთ და მხოლოდ ამის შემდეგ განახლდეს განხილვა. ამასთან, “ლელოს” ინიციატივაა 20 ივნისთან დაკავშირებით საპარლამენტო საგამოძიებო კომისიის შექმნა”, – განაცხადა ნაცვლიშვილმა.

.interpressnews