ჯო ბაიდენმა 2 ტრილიონიანი ინფრასტრუქტურის საინვესტიციო გეგმა წარადგინა

აშშ-ის პრეზიდენტმა ჯო ბაიდენმა ინფრასტრუქტურის საინვესტიციო გეგმა წარადგინა, რომლის მოცულობა 2 ტრილიონ აშშ დოლარს შეადგენს. პრეზიდენტის მიერ ინიცირებული გეგმა ითვალისწინებს გზების, მაგისტრალების, ხიდების, პორტების მშენებლობასა და აღდგენას, კლიმატის ცვლილებისგან გამოწვეული კრიზისის წინააღმდეგ ბრძოლასა და სოციალური მომსახურების გაუმჯობესებას.

გეგმა 8-წლიანია და ითვალისწინებს მილიარდობით აშშ დოლარის გამოყოფას მაღალსიჩქარიანი ინტერნეტის ხელმისაწვდომობის გაფართოების, წყლის მილების შეცვლის, სუფთა სასმელი წყლის ხელმისაწვდომობის და ახალ, უფრო სუფთა ენერგიის წყაროებზე გადასვლის მიზნით. ის ასევე მოხმარდება მოხუცთა და შეზღუდული შესაძლებლობის მქონე პირთა დაწესებულებებში პირობების გაუმჯობესებას, სკოლების მოდერნიზებას.

ბაიდენის თქმით, დაფინანსების პაკეტი ქვეყანაში მილიონობით სამუშაო ადგილის შექმნას შეუწყობს ხელს. ბაიდენის გეგმა, სხვა ინიციატივებთან ერთად, გადასახადის განაკვეთს 21% -დან 28% -მდე გაზრდას და საგადასახადო კოდის შეცვლას ითვალისწინებს, რისი მიზანიც, იმ ხარვეზების აღმოფხვრაა, რაც კომპანიებს მოგების საზღვარგარეთ გადატანის საშუალებას აძლევს. პრეზიდენტის მიერ ინიცირებული გეგმა კონგრესმა უნდა დაამტკიცოს.

interpressnews.