კახა კალაძე ტვ „პირველზე“ – ძალიან ბევრი საკითხი იყო გაზვიადებული, არავინ არსად შევარდნას არ აპირებს, ამას სრული პასუხისმგებლობით გეუბნებით
კანონის წინაშე ყველა თანასწორუფლებიანი ვართ, – ასე შეაფასა თბილისის მერმა, კახა კალაძემ ფარული ჩანაწერების გამოქვეყნების შემდეგ, ტელეკომპანია „პირველთან“ დაკავშირებით განვითარებული ბოლოდროინდელი პროცესები.
მისი განცხადებით, ტელევიზიაში შეჭრას არავინ აპირებს.
„პირველი, რაც მინდა ვთქვა, კანონის წინაშე ყველა თანასწორუფლებიანი ვართ. რაც შეეხება კონკრეტულ საკითხს, რასაც მეკითხებით, პირველ რიგში, თქვენ უნდა იყოთ დაინტერესებული იმით, რომ გამოძიება რაც შეიძლება სწრაფად და დროულად დასრულდეს იმ კონკრეტულ აუდიოჩანწერებთან დაკავშირებით. ბევრი განცხადება გაკეთდა, ძალიან ბევრი საკითხი იყო გაზვიადებული, არავინ არსად შევარდნას არ აპირებს, ამას სრული პასუხისმგებლობით გეუბნებით“, – განუცხადა კალაძემ ჟურნალისტებს.
ცნობისთვის, „ტვ პირველის” ინფორმაციით, მათ მოიპოვეს ფარული აუდიო ჩანაწერი, რომლითაც, მათივე მტკიცებით, მომღერალი ბერა ივანიშვილი, სავარაუდოდ, სახელმწიფო დაცვის სპეციალური სამსახურის ამჟამინდელ ხელმძღვანელს ანზორ ჩუბინიძეს იმ ახალგაზრდების დასჯას სთხოვს, რომელთაც ინტერნეტში ივანიშვილების შეურაცხმყოფელი კომენტარები დაწერეს. ამასთან, ტელეკომპანიის მიერ გავრცელებული ჩანაწერის მიხედვით, ბერა ივანიშვილი ამ საკითხზე ირაკლი ღარიბაშვილთან საუბრობს, რომელიც ამ ქმედებებს იწონებს. აღნიშნულთან დაკავშრებით პროკურატურამ გამოძიება კერძო საუბრის უნებართვო ჩაწერისა და მოპოვებული ინფორმაციის უკანონოდ გამოყენების ფაქტებზე დაიწყო.
interpressnews
