გიგი წერეთელი – არავის მოსწონს, რომ ოპოზიცია პარლამენტში არ არის, მაგრამ ვინ შექმნა ვითარება, როცა ოპოზიციური პარტიები მანდატებზე უარს აცხადებს?!
არავის მოსწონს, რომ ოპოზიცია პარლამენტში არ არის, მაგრამ ვინ შექმნა ვითარება, როცა ოპოზიციური პარტიები მანდატებზე უარს აცხადებს?! – პირველ რიგში, იმ მანიპულაციებმა და ძალდობრივმა კამპანიამ, რაც არჩევნებზე ვნახეთ, – ამის თაობაზე ჟურნალისტებს “ევროპული საქართველოს“ ერთ-ერთმა ლიდერმა გიგი წერეთელმა განუცხადა.
წერეთლის თქმით, თუკი პარლამენტი რეალურად მრვალპარტიული გახდება, ეს იმას ნიშნავს, რომ ხელისუფლებას რაღაც კომპრომისები აქვს გადაწყვეტილი და ეს კარგი პერსპექტივაა.
“ნამდვილად ვერ გეტყვით, რა აძლევთ “ქართული ოცნების“ ლიდერებს იმის თქმის საფუძველს, რომ პარლამენტში ოპოზიცია მრავლად იქნება წარმოდგენილი. აქვე უნდა ითქვას, რომ არავის ოცნება არ იყო ის, რომ პარლამენტში არ ყოფილიყო, მაგრამ სწორედ ხელისუფლების მიერ შექმნილ ვითარებაში, დღევანდელი მოცემულობა ასეთია – ძირითადი პოლიტიკური მოთამაშეები ოპოზიციურ ფლანგზე პარლამენტში არ არიან და შესვლას არც აპირებენ. თუკი ვინმე ცალკე, თითო-ოროლა შევა, ეს რა თქმა უნდა, სურათს არ შექმნის. ეს იქნება იმის ფალსიფიკაცია, რომ თითქის პარლამენტში არის მრავალპარტიულობა“, – განაცხადა გიგი წერეთელმა.
