ინდოეთში კორონავირუსის წინააღმდეგ მოსახლეობის ვაქცინაცია დაიწყო

ინდოეთში კორონავირუსის წინააღმდეგ მოსახლეობის ვაქცინაციის პროგრამა დღეს დაიწყო, – ამის შესახებ ინფორმაციას CNN-ი ავრცელებს.

ტელეკომპანიის ცნობით, ქვეყნის მასშტაბით ვაქცინაციის 3 000-ზე მეტი ცენტრია გახსნილი, სადაც, დღესვე, საერთო ჯამში, 300 000-მდე მოქალაქეს აცრიან.

ინდოეთში, პირველ ეტაპზე სამედიცინო მუშაკების ვაქცინაცია ხორციელდება, რომლის ფარგლებში, სამედიცინო სფეროს 30 მილიონი წარმომადგენელი უფასოდ აიცრება.

ვაქცინაცია ორი ვაქცინის გამოყენებით, AstraZeneca-სა და ოქსფორდის უნივერსიტეტის ერთობლივად შექმნილი ვაქცინითა და ინდური კომპანია Bharat Biotech-ის ვაქცინით – Covaxin-ით- მიმდინარეობს.

ცნობისათვის, კოვიდინფიცირებულების რაოდენობით ინდოეთი მეორე ადგილზეა მსოფლიოში. ქვეყანაში, პანდემიის დაწყების დროიდან, კორონავირუსის 10.5 მილიონზე მეტი შემთხვევაა გამოვლენილი, დაღუპულთა რაოდენობა კი 152 000-ს აჭარბებს.