ნიდერლანდების მთავრობა ბავშვთა დახმარებების სკანდალის გამო გადადგა

ნიდერლანდების მთავრობა ბავშვთა დახმარებების სკანდალის გამო გადადგა.როგორც BBC წერს, პრემიერ-მინისტრ მარკ რუტეს მთავრობა მას შემდეგ გადადგა, რაც საგადასახადო ორგანოებმა ათასობით ოჯახი შეცდომით დაადანაშაულეს ბავშვთა დახმარებებით თაღლითობაში და თანხის უკან დაბრუნება მოსთხოვეს.

მთავრობამ შეცდომაზე პასუხისმგებლობა აიღო.

„ჩვენ ერთსულოვნები ვართ: თუკი მთელმა სისტემამ კრახი განიცადა, მხოლოდ ერთობლივი პასუხისმგებლობა გვეკისრება“, – განაცხადა პრემიერმა ჰააგაში მთავრობის წევრებთან შეხვედრის შემდეგ.

არჩევნები ქვეყანაში 17 მარტს იგეგმება. ამ დრომდე მთავრობა მოვალეობას შეასრულებს პრობლემების მოგვარების მიზნით, თუმცა ეკონომიკის მინისტრი დაუყოვნებლივ გადადგა. მარკ რუტე ხელისუფლებაში 2010 წლიდან არის. მისი თქმით, გადაწყვეტილება პარლამენტთან მჭიდრო კონსულტაციების შემდეგ მიიღო. კონკრეტულად კი, საპარლამენტო გამოძიებამ დაადგინა, რომ საგადასახადო სამსახურების წარმომადგენლებმა შეცდომით დაადანაშაულეს ოჯახები ბავშვებისთვის განკუთვნილი სუბსიდიების თაღლითობაში, რამაც „უპრეცედენტო უსამართლობა“ გამოიწვია. დაახლოებით 10 000 ოჯახს დააბრუნებინეს უკან ბავშვების მოვლაზე დახმარების სახით მთავრობის მიერ გაცემული ათობით ათასი ევრო, რამაც ოჯახებს მოუტანა უმუშევრობა, გაკოტრება და განქორწინებები. მათგან ბევრი იმიგრანტების ოჯახები იყვნენ. როგორც BBC წერს, მშობლები თაღლითებად მცირე შეცდომების გამო შერაცხეს, როგორიც არის დოკუმენტებზე ხელმოწერა და ა.შ.