რუსეთმა „ღია ცის შეთანხმებიდან“ გასვლის პროცესი დაიწყო

რუსეთმა „ღია ცის შეთანხმებიდან“ გასვლის პროცედურები დაიწყო, – რუსული მედიის ინფორმაციით, ამის შესახებ რუსეთის საგარეო საქმეთა სამინისტროს მიერ გავრცელებულ განცხადებაშია აღნიშნული.

„ხელშეკრულების სამომავლო ფუნქციონირებისთვის შემაფერხებელი დაბრკოლებების პრევენციის მცდელობებში პროგრესის არარსებობის გათვალისწინებით, რუსეთის საგარეო საქმეთა სამინისტრო უფლებამოსილია, „ღია ცის შეთანხმებიდან“ გასვლის მიზნით შიდა პროცედურების დაწყების შესახებ განაცხადოს“, – აცხადებენ რუსეთის საგარეო უწყებაში.

მათივე განმარტებით, პროცედურების დასრულებისთანავე დეპოზიტარებს შესაბამისი შეტყობინება გაეგზავნებათ.

განცხადებაში აღნიშნულია, რომ ვაშინგტონის მიერ ხელშეკრულებიდან გასვლამ მის ხელმომწერებს შორის ინტერესთა ბალანსი დაარღვია და ნდობისა და უსაფრთხოების უზრუნველყოფაში ხელშეკრულების როლი შეარყია.

„აშშ-ის მიერ ხელშეკრულების დატოვების შემდეგ მოსკოვმა, მისი შენარჩუნების მიზნით, ”ღია ცის შესახებ” ხელშეკრულების ფუნდამენტური დებულებების შესაბამისად კონკრეტული ინიციატივები წარადგინა. სამწუხაროა, რომ ამ ინიციატივებმა აშშ-ის მოკავშირეების მხრიდან მხარდაჭერა ვერ მოიპოვა”, – ნათქვამია უწყების განცხადებაში.

შეგახსენებთ, „ღია ცის შეთანხმება“ 1992 წელს გაფორმდა. შეთანხმების თანახმად, მონაწილე ქვეყნებს ერთმანეთის ტერიტორიაზე შეუიარაღებელი სადაზვერვო ფრენების განხორციელება შეუძლიათ. აშშ-მა ხელშეკრულება 2020 წლის 22 ნოემბერს დატოვა. ვაშინგტონმა გადაწყვეტილების მიღების მიზეზად რუსეთის მიერ ხელშეკრულების გარკვეული პუნქტების პერმანენტული დარღვევა დაასახელა.