ინდონეზიაში მომხდარი მიწისძვრის მსხვერპლი 34-მდე გაიზარდა
ინდონეზიაში, სულავესის კუნძულზე მომხდარი 6.2 მაგნიტუდის სიმძლავრის მიწისძვრის შედეგად დაღუპულთა რაოდენობა 34-მდე გაიზარდა, – ამის შესახებ ინფორმაციას The Guardian-ი ავრცელებს.
გამოცემის ცნობით, მიწისძვრამ ასობით სახლი დაანგრია და დააზიანა, მათ შორის არის საავადმყოფო, სადაც რამდენიმე პაციენტი და თანამშრომელი ნანგრევებშია მოყოლილი.
ყველაზე მეტი გარდაცვლილი ქალაქ მამუჯუშია, სადაც სტიქიას 26 ადამიანის სიცოცხლე ემსხვერპლა.
ადგილობრივი ხელისუფლების წარმომადგენლები ვარაუდობენ, რომ მსხვერპლის რაოდენობა კიდევ უფრო გაიზრდება.
აღსანიშნავია, რომ დაზარალებულ ტერიტორიებამდე მისვლას სტიქიის შედეგად ჩაკეტილი გზები და ჩანგრეული ხიდები ართულებს. გავრცელებული ინფორმაციით, დაზიანდა მამუჯუს აეროპორტიც. მოსახლეობა ელექტროენერგიის გარეშეა დარჩენილი.
შეგახსენებთ, ინდონეზიაში 6.2 მაგნიტუდის სიმძლავრის მიწისძვრა დღეს დილით მოხდა.
