ბექა დავითულიანი ბუკნარში დაპირისპირებაზე – ყველამ პატივი უნდა ვცეთ ერთმანეთის მრწამსს, ერთმანეთის რელიგიურ გრძნობებს
ყველამ პატივი უნდა ვცეთ ერთმანეთის მრწამსს, ერთმანეთის რელიგიურ გრძნობებს, – ასე შეაფასა საპარლამენტო უმრავლესობის წევრმა, ბექა დავითულიანმა სოფელ ბუკნარში მომხდარი დაპირისპირება.
როგორც მან ჟურნალისტებს განუცხადა, გადამეტებული და ზოგჯერ აგრესიული ქმედებებით ქვეყნის არაკეთილისმსურველებს საკუთარი ზრახვების განხორციელების საშუალება არ უნდა მიეცეთ.
„ყველამ პატივი უნდა ვცეთ ერთმანეთის მრწამსს, ერთმანეთის რელიგიურ გრძნობებს. ხშირად ჩვენი გადამეტებული და დამწუხაროდ, ზოგჯერ აგრესიული ქმედებებით არ უნდა შევუქმნათ ამ ქვეყნის არაკეთილისმსურველებს საკუთარი ზრახვების განხორციელების ნოყიერი ნიადაგი. ჩემი პოზიცია ასეთია, ამ ქვეყანას აქვს ტოლერანტობის ძალიან დიდი ტრადიცია და გამოცდილება. დარწმუნებული ვარ, ეს ყველა ქართველის გენეტიკურ კოდში დევს და ზუსტად ამ ტრადიციისა და ურთიერთობის გათვალისწინებით გავაგრძელებთ ურთიერთობას“,-განაცხადა დავითულიანმა.
ცნობისთვის, მუსლიმი თემის წარმომადგენლები ითხოვდნენ, რომ მუსლიმურ სამლოცველოში ლოცვის საშუალება ჰქონოდათ. მათი ინფორმაციით, აღნიშნულს ადგილობრივი ქრისტიანული მოსახლეობა ეწინააღმდეგებოდა.
