დიმიტრი ხუნდაძის ინფორმაციით, ქვეყანას მინუს 70-გრადუსიან პირობებში, დაახლოებით 100 ათასი მოქალაქისთვის საკმარისი კორონავირუსის საწინააღმდეგო ვაქცინის შენახვის საშუალება აქვს

პარლამენტის ჯანდაცვის კომიტეტის თავმჯდომარის დიმიტრი ხუნდაძის ინფორმაციით, ქვეყანას მინუს 70-გრადუსიან პირობებში, დაახლოებიოთ 100 ათასს მოქალაქეზე საჭირო კოვიდ საწინააღმდეგო ვაქცინის შენახვის საშუალება აქვს. ეს კი, დაახლოებით 200 ათასი ვაქცინაა.

„არსებობს ვაქცინები, რომლის შენახვა განსაკუთრებულ პირობებს ითხოვს. პირველ ეტაპზე, რა ვაქცინაზეც გვაქვს შესაძლებლობა, რომ შემოვიდეს, არის „ფაიზერის“ ვაქცინა, თუმცა აუცილებელია მინუსს 70-გრადუსიანი შენახვის პორობების არსებობა. ქვეყანას ამის რესურსი გააჩნია, მაგრამ არა იმ რაოდენობით, რომ მთლიანად შევძლოთ ამ ტიპის ვაქცინის შენახვა და შემდეგ მოსახლეობისათვის მიწოდება. ასეთი ინფრაქტუქტურა არის თბილისში, ქუთაისსა და ბათუმში. ეს არის დაახლოებით 100 ათასს მოქალაქეზე საჭირო ვაქცინის შენახვის საშუალება. ეს არის დაახლოებით 200 ათასი ვაქცინა“, – განაცხადა ხუნდაძემ პარლამენტის ჯანდაცვის კომიტეტის სხდომაზე.

მისივე თქმით, ვაქცინასთან დაკავშირებით მუშაობა სხვა მიმართულებითაც მიდის, რა პროცესშიც შეუცვლელი პირობაა, რომ ვაქცინა ავტორიზებული იყოს ჯანდაცვის მსოფლიო ორგანიზაციის მიერ და შენარჩუნებული იყოს მისი მაღალი ხარისხი.

„18 იანვარს ქვეყნები, მათ შორის საქართველო „კოვაქსში“ წარადგენს განაცხადს, სადაც ასახული უნდა იყოს ვაქცინის გამოყენების ინტერესი და სურვილი. 19-28 იანვრისთვის ჯანმო, იუნისეფი განიხილავს განცხადებებს ქვეყნის მიერ წარდგენილ ვაქცინის დანერგვის გეგმის შესახებ. თვის ბოლოს იქნება პირველი ეტაპი, განაწილების გადაწყვეტილებებთან დაკავშირებით. იმედი გვაქვს, რომ საქართველო ამ რიგში წინა პოზიციაზე აღმოჩნდება და ვაქცინას სწრაფად მივიღებთ“, – განაცხადა ხუნდაძემ.

დეპუტატმა საკომიტეტო სხდომაზე რამდენჯერმე აღნიშნა, რომ საქართველოში შემთხვევითი ვაქცინა არ შემოვა და მოსახლეობა დამატებითი რისკის ქვეშ არ დადგება.

ხუნდაძის თქმით, COVID-19-ის საწინააღმდეგო ვაქცინით პირველ რიგში, მედპერსონალი აიცრება, ხოლო შემდეგ – მიზნობრივი რისკ-ჯგუფები.