ფოთში, რეკვავას ქუჩის სარეაბილიტაციო სამუშაოებზე დასაქმებულებმა ანაზღაურების მოთხოვნით აქცია გამართეს

ფოთში, რეკვავას ქუჩის სარეაბილიტაციო სამუშაოებზე დასაქმებულმა მოქალაქეებმა აქცია გამართეს. ისინი კუთვნილ ანაზღაურებას ითხოვენ. მათ პრეტენზიები კომპანია ,,გზატკეცილი პლიუსთან“ აქვთ, რადგან, მათივე თქმით, აღნიშნული ფირმა ახორციელებს გზის რეაბილიტაციას და მარტის თვიდან თანამშრომლობდნენ მასთან.

როგორც ისინი აცხადებენ, კომპანიის დირექტორმა გამოიყენა მათი შრომითი რესურსი და ტექნიკა შემდეგ კი, ჩაანაცვლა ახალი ჯგუფით და ანაზღაურების სრულად გადახდაზე უარი განაცხადა.

„რეკვავას ქუჩა, რომელიც წლების მანძილზე იყო დაზიანებული აღვადგინეთ, შესრულებულ სამუშაოებში ვინც მიიღო მონაწილეობა ყველა არის დაზარალებული, რადგან არ არის თანხა სრულად ჩარიცხული. კომპანია „გზატკეცილი პლიუსთან“ ვთანამშრომლობთ მარტის თვიდან და ჩვენი ნდობა ბოროტად გამოიყენა. ჩვენს ხარჯზე დაასრულა ორი პროექტი და ახლა დავალიანების დაფარვაზე უარს აცხადებს“, – განაცხადა აქციის მონაწილე ბორის შოშიტაიშვილმა.

კომპანიაში აქციის მონაწილეთა მოთხოვნას უსაფუძვლოს უწოდებენ. როგორც იქ აცხადებენ, შ.პ.ს. ,,გზატკეცილი პლიუსმა“ თითოეულ სუბიექტს დავალიანება სრულად დაუფარა და ამის დამამტკიცებელი დოკუმენტებიც აქვთ.

„ის პრეტენზიები, რაც აქციის მონაწილეებს გააჩნიათ არ არის სწორი, ვინაიდან, შ.პ.ს „გზატკეცილს“ რა სამუშაოებიც შესრულდა აბსოლუტურად გადარიცხული აქვს, რაზედაც ჩვენ შესაბამისი აქტიც წარვადგინეთ და გამოძიება მიმდინარეობს. აქ სამართლებლივ ჩარჩოს არ სცემენ პატივს, ჯერ ეტყობა ცივილიზაცია არ არის შემოსული და თვითონ რაც უნდათ, იმას ამბობენ. 650 ათასი ლარი აქვს გადარიცხული „გზატკეცილს“ და თუ რამე პრეტენზია აქვთ მიმართონ სასამართლოს“, – განაცხადა შ.პ.ს. „გზატკეცილის“ იურისტმა დარეჯან ბუცხრიკიძემ.

აქციის მონაწილეები აცხადებენ, რომ მოთხოვნების დაუკმაყოფილებლობის შემთხვევაში კომპანიას რეკვავას ქუჩაზე სამუშაობის გაგრძელების უფლებას არ მისცემენ.