აშშ იემენელი ჰუსიტების ტერორისტულ დაჯგუფებად აღიარებას გეგმავს
შეერთებული შტატები ირანის მიერ მხარდაჭერილ იემენელ ჰუსიტებს, ტერორისტულ დაჯგუფებად აღიარებს, – ამის შესახებ აშშ-ის სახელმწიფო მდივანმა მაიკ პომპეომ განაცხადა.
„ამ აღიარების მიზანია ანსარ ალაჰს [ჰუსიტების დაჯგუფების ოფიციალური სახელი] პასუხისმგებლობა დაეკისროს მის მიერ განხორციელებული ტერორისტული აქტების გამო,“- ნათქვამია პომპეოს განცხადებაში.
ამ კონტექსტში აშშ-ის სახელმწიფო მდივანმა ხაზი გაუსვა 30 დეკემბერს ადენის აეროპორტზე განხორციელებულ თავდასხმის, რასაც 26 ადამიანის სიცოცხლე ემსხვერპლა და რაშიც საუდის არაბეთის მიერ მხარდაჭერილი მთავრობა ჰუსიტებს ადანაშაულებს.
ტერორისტულ დაჯგუფებად აღიარების შემდეგ მოსალოდნელია, რომ ბევრი გარე აქტორი ჰუსიტებთან საქმის დაკავებისგან თავს შეიკავებს, მათ შორის საბანკო გადარიცხვებისგან, საკვები პროდუქტებისა და საწვავის ყიდვისგან.
აშშ-ის ხელისუფლების გადაწყვეტილებას ჰუსიტების ოფიციალური პირი მუჰამედ ალი ალ-ჰუთი გამოეხმაურა და აღნიშნა, რომ „დონალდ ტრამპის ადმინისტრაციის პოლიტიკა და ქცევა ტერორისტულია.“
„ვიტოვებთ უფლებას, ტრამპის ან რომელიმე სხვა ადმინისტრაციის ნაბიჯს ვუპასუხოთ,“- განაცხადა მუჰამედ ალი ალ-ჰუთიმ.
ჰუსიტები იემენის ჩრდილოეთ ნაწილის დე ფაქტო მმართველები არიან.
