წინასწარი მონაცემებით, ყირგიზეთის საპრეზიდენტო არჩევნებში სადირ ჯაფაროვი ლიდერობს

წინასწარი მონაცემებით, ყირგიზეთის საპრეზიდენტო არჩევნებში სადირ ჯაფაროვი ლიდერობს, – ამის შესახებ ინფორმაციას BBC-ი ავრცელებს.

გამოცემის ცნობით, ბიულეტენების უმეტესი ნაწილის დათვლის შედეგად ცნობილი გახდა, რომ ჯაფაროვმა არჩევნებში ხმების თითქმის 80 % მოიპოვა.

ყირგიზეთში პრეზიდენტობისთვის 17 კანდიდატი იბრძოდა.

პრეზიდენტის გარდა ყირგიზეთის მოქალაქეებს ქვეყნის მმართველობის ფორმაც უნდა აერჩიათ. წინასწარი მონაცემებით, ამომრჩეველთა 80 %-ზე მეტმა მხარი დაუჭირა წინადადებას კონსტიტუციის რეფორმირების შესახებ, რომელიც პრეზიდენტისთვის პარლამენტის ხარჯზე უფრო მეტი უფლებამოსილების მინიჭებას ითვალისწინებს.

ყირგიზეთი გასული წლის ოქტომბერში ჩატარებული საპარლამენტო არჩევნების შემდეგ პოლიტიკურ კრიზისში აღმოჩნდა. არჩევნებში მმართველი გუნდის გამარჯვების შემდეგ ქვეყანაში მასშტაბური საპროტესტო აქციები დაიწყო. მოსახლეობა არჩევნების შედეგებს არ აღიარებდა და ხელისუფლებას მათ გაყალბებაში ადანაშაულებდა. საპროტესტო აქციების ფონზე, ყირგიზეთის პრეზიდენტი, სოორონბაი ჟეენბეკოვი გადადგა.