ვლადიმერ პუტინი 11 იანვარს ილჰამ ალიევს და ნიკოლ ფაშინიანს შეხვდება
მოსკოვში 11 იანვარს, რუსეთის პრეზიდენტის ვლადიმერ პუტინის, სომხეთის პრემიერ-მინისტრის ნიკოლ ფაშინიანის და აზერბაიჯანის პრეზიდენტის ილჰამ ალიევის შეხვედრა გაიმართება. ამის შესახებ კრემლის პრესსამსახური იუწყება.
მათივე ცნობით, ლიდერები აპირებენ განიხილონ მთიანი ყარაბაღის დარეგულირების საკითხი და მომდევნო ნაბიჯები, რომლებიც რეგიონში არსებული პრობლემების გადასაწყვეტად უნდა გადაიდგას.
განსაკუთრებული ყურადღების დათმობა იგეგმება იმ საკითხებისადმი, რომლებიც ომით დაზარალებული რეგიონების მცხოვრებლებისთვის დახმარებას ითვალისწინებს, ასევე დაბლოკილი სავაჭრო-ეკონომიკური და სატრანსპორტო კავშირის აღდგენის საკითხებს.
გარდა ამისა, ვლადიმერ პუტინი ცალ-ცალკე შეხვდება სომხეთისა და აზერბაიჯანის ლიდერებს.
სომხეთის პრემიერის პრესმდივანმა მანე გევორგიანმა განაცხადა, რომ შეხვედრაზე არ იგეგმება მთიანი ყარაბაღის ან ტერიტორიულ საკითხებთან დაკავშირებული რაიმე სახის დოკუმენტზე ხელმოწერა.
