აჭარის მთავრობის სახლთან ოპოზიციური პარტიების ლიდერები და მათი მხარდამჭერები საპროტესტო აქციას მართავენ
აჭარის მთავრობის სახლთან სხვადასხვა ოპოზიციური პარტიების ლიდერები და მათი მხარდამჭერები საპროტესტო აქციას მართავენ.
როგორც „ერთიანი ნაციონალური მოძრაობის” წევრმა გიორგი კირთაძემ განაცხადა, ოპოზიციის წევრები აჭარის ყველა მუნიციპალიტეტში „თავისუფლების კვარტალს” გახსნიან, რომლის მიზანია მოსახლეობის დახმარება და საპროტესტო აქციების ორგანიზება.
გიორგი კირთაძის ინფორმაციით, „თავისუფლების კვარტალი” მოეწყობა როგორც კარვებში, ასევე შენობებში.
ოპოზიციის წევრების მთავარი მოთხოვნაა, რომ ხელახალი საპარლამენტო არჩევნები ჩატარდეს.
„70-ე დღეა უწყვეტ საპროტესტო აქციებს „თავისუფლების კვარტალში” ვმართავთ. ბიძინა ივანიშვილი და თორნიკე რიჟვაძე ამბობდნენ, რომ დაიღლებიან და მალე დაიშლებიან, თუმცა ყველამ ნახეთ, არათუ დავიშალეთ, გავიშალეთ.
„თავისუფლების კვარტალი” იქნება აჭარის ყველა მუნიციპალიტეტში, გამგეობის შენობებში. ყველგან მივალთ, ყველა თანაქალაქელთან და ავუხსნით, რომ მათ პროტესტს გადამწყვეტი მნიშვნელობა აქვს. ივანიშვილის ოლიგარქიული რეჟიმის წინააღმდეგ, სხვა გზა აღარ დარჩა. აქ აქცია გაგრძელდება, „თავისუფლების კვარტალი” ფუნქციონირებას აჭარის მთავრობის სახლთან გააგრძელებს, რომლის მთავარი მიზანი იქნება მჭიდრო ურთიერთობა მოსახლეობასთან და საპროტესტო აქციების ორგანიზება. ყველა რაიონში ძალიან ძლიერი გუნდი გვეყოლება, რომელიც ბევრ სასიკეთო საქმეს გააკეთებს. ძალიან ბევრი ადამიანის ქუჩაში ხილვით ბიძინა ივანიშვილი დაიხევს უკან და დანიშნავს სამართლიან არჩევნებს. რაც შეეხება პანდემიის გამო შეზღუდვებს, აქციები კოვიდ წესების დაცვით მიმდინარეობს”,- განაცხადა გიორგი კირთაძემ.
