დეკანოზი ანდრია ჯაღმაიძე – ვისაც უნდა სწორად გაგება, მეუფე იოანემ საკმაოდ დეტალურად განმარტა, შეხვდა ისრაელის ელჩს და იქ ყველაფერი იყო ცხადი
საპატრიარქოს საზოგადოებასთან ურთიერთობის სამსახურის ხელმძღვანელის, დეკანოზ ანდრია ჯაღმაიძის განცხადებით, მეუფე იოანეს ებრაელი ხალხი კნინობით ფორმაში არ მოუხსენიებია. მისივე ინფორმაციით, აღნიშნულ საკითხზე მეუფე ისრაელის ელჩსაც შეხვდა და „იქ ყველაფერი იყო ცხადი“.
„მეუფე იოანემ გააკეთა ამის შესახებ დაწვრილებითი განმარტება. მას ებრაელი ხალხი არ მოუხსენიებია არანაირ კნინობით ფორმაში. მისი ნათქვამი ეხებოდა იმ ჯგუფებს, საზოგადოების იმ ნაწილს, რომელიც მუდამ ცდილობს, რომ რაღაც ჩრდილი მიადგეს ეკლესიას. ეს მათ მიმართ იყო ნათქვამი.
„ქრისტიანთა მდევნელი“ კი არ უწოდა, მან მოიყვანა ისტორიული ციტატა წმინდანის, როცა უკვე თავისი სიტყვებით ლაპარაკობს, ის ამბობს, რომ ეკლესიის წინააღმდეგ ბრძოლა არ შემოისაზღვრება ეთნიკური ნიშნით და ამის მერე ჩვენს ქართულ რეალობაზე ლაპარაკობს. ვისაც უნდა სწორად გაგება, მან საკმაოდ დეტალურად განმარტა, შეხვდა ისრაელის ელჩს საქართველოში და იქ ყველაფერი იყო ცხადი“, – განაცხადა ჯაღამაიძემ.
