ფოთში მერიის შენობასთან აქციის მონაწილეებმა თევზი მიიტანეს
ფოთში მერიის ადმინისტრაციულ შენობასთთან აქცია მიმდინარეობს. “ნაციონალური მოძრაობის”ახალგაზრდული ორგანიზაციის წევრები, მხარდამჭერები და რიგითი მოქალაქეები ქალაქში თევზის უსიამოვნო სუნს აპროტესტებენ. მათი თქმით, თევზის სუნი ქაფშიის გადამუშავების სეზონზე ნოემბერ-თებერვლის პერიოდშია. შეკრებილები ხელისუფლებას სათანადო ზომების მიღებას სთხოვენ და აცხადებენ, რომ აღნიშნული პრობლემა წლებია აწუხებთ.
აქციის მონაწილეებმა მერიის შენობასთან ჯამით ქაფშია მიიტანეს. ისინი მერთან შეხვედრას ითხოვენ.
„ვაპირებთ შევაწუხოთ ხელისუფლება, რომ მიიღონ შესაბამისი ზომები, თუ არადა დაიხურონ ქუდი და წავიდნენ სახლში, ასეთი მთავრობა ფოთელებს არ ეკადრება. დღეს გამაფრთხილებელი აქციაა, მიეცემათ ორი დღე პრობლემის მოსაგვარებლად და წინააღმდეგ შემთხვევაში მივმართავთ პროტესტის უკიდურეს ზომებს“ – აცხადებს აქციის მონაწილე გიორგი ქვარცხავა.
თავის მხრივ, ქარხნების ხელმძღვანელების მტკიცებით, ყველა საწარმო შესაბამისი ფილტრით არის აღჭურვილი.
ცნობისთვის, ფოთში თევზის გადამამუშავებელი ოთხი ლიცენზირებული საწარმო ფუნქციონირებს. ადგილზე მობილიზებული არიან სამართალდამცველები.
