იოსებ ხახალეიშვილმა ავტოქარხნის დასახლებაში საგზაო სამუშაოები დაათვალიერა

ქუთაისის მერმა იოსებ ხახალეიშვილმა, მერის მოადგილემ იუზა უგულავამ, ინფრასტურქტურის განვითარებისა და კეთილმოწყობის სამსახურის უფროსთან ბექა ყურაშვილთან ერთად, ავტოქარხნის დასახლებაში, ჯაილოვას ქუჩაზე მიმდინარე საგზაო სამუშაოები დაათვალიერეს.

როგორც „ინტერპრესნიუსს“ ქუთაისის მერიიდან აცნობეს, ჯაილოვას ქუჩაზე საგზაო ინფრასტრუქტურულ სამუშაოებს საავტომობილო გზების დეპარტამენტი ახორციელებს. მათივე ინფორმაციით, გზაზე იგება ასფალტის საფარი, კეთდება სანიაღვრე სისტემა და ბორდიურები, რისთვისაც 1 400 000 ლარია გამოყოფილი. სამუშაოებს ტენდერში გამარჯვებული ფირმა „ ორიენტირი“ ასრულებს.

„საავტომობილო გზების დეპარტამენტის მიერ, ქუთაისში 32 ქუჩის რეაბილიტაცია მიმდინარეობს, მათ შორის ორი ცენტრალური – აღმაშენებლისა და წერეთლის ქუჩების. ამ ქუჩებზე, საგზაო ინფრასტრუქტურასთან ერთად, სრულად მოწესრიგდება სანიაღვრე სისტემები, ბორდიურები, ტროტუარები. ამ დროისთვის რეაბილიტაცია უკვე ჩაუტარდა 10 ქუჩას. ჯაილოვას ქუჩაზეც დაწყებულია სარეაბილიტაციო სამუშაოები. პროექტის დასრულების შემდეგ, ქუთაისის ქუჩებში გადაადგილება უსაფრთხო და კომფორტული იქნება“, – განაცხადა იოსებ ხახალეიშვილმა.

ქუთაისის მერიის ინფორმაციით, ჯაილოვას ქუჩის რეაბილიტაცია აპრილში დასრულდება.