ჯო ბაიდენი დონალდ ტრამპზე – კარგია, რომ ინაუგურაციაზე არ მოვა, ვიცე-პრეზიდენტ მაიკის მოსვლა კი მისასალმებელი იქნება
აშშ-ის არჩეული პრეზიდენტი ჯო ბაიდენი აცხადებს, რომ დონალდ ტრამპის გადაწყვეტილება, არ დაესწროს ინაუგურაციის ცერემონიალს, ერთ-ერთია იმ მცირე საკითხებს შორის, რაზედაც ის მოქმედ პრეზიდენტს ეთანხმება.
„კარგია, რომ ინაუგურაციაზე არ მოვა. ეს ერთ-ერთია იმ მცირე საკითხებს შორის, რაზეც მე და ის ოდესმე შევთანხმებულვართ,“- აღნიშნა ბაიდენმა.
მისი თქმით, დონალდ ტრამპი ერთ-ერთი ყველაზე არაკომპეტენტური პრეზიდენტია აშშ-ის ისტორიაში.
„მან გადააჭარბა ჩემს ყველაზე უარეს წარმოდგენას მის შესახებ. ის ერთ-ერთი ყველაზე არაკომპეტენტური პრეზიდენტია შეერთებული შტატების ისტორიაში,”- აღნიშნა ბაიდენმა.
არჩეულმა პრეზიდენტმა განაცხადა, რომ მოხარული იქნება, თუკი ინაუგურაციას ვიცე-პრეზიდენტი მაიკ პენსი დაესწრება.
„ვიცე-პრეზიდენტ მაიკის მოსვლა მისასალმებელია, მოხარული ვიქნები, თუ იქ იქნება,“- აღნიშნა ჯო ბაიდენმა.
აშშ-ის პრეზიდენტმა დონალდ ტრამპმა გუშინ განაცხადა, რომ ის ჯო ბაიდენის ინაუგურაციას არ დაესწრება.
