19 წლის ძმის მკვლელობაში ბრალდებული გიორგი ახლოურისთვის აღკვეთის ღონისძიების შეფარდებაზე სასამართლო დღეს იმსჯელებს
19 წლის ძმის მკვლელობაში ბრალდებული გიორგი ახლოურისთვის აღკვეთის ღონისძიების შეფარდებაზე თბილისის საქალაქო სასამართლო დღეს, 12:30 საათზე იმსჯელებს.
სასამართო პროცესი სრულად დისტანციური ფორმატით გაიმართება. პროცესს მოსამართლე ლაშა კლდიაშვილი გაუძღვება.
დაკავებულს ბრალი უკვე წარედგინა.
როგორც ადვოკატი, თამარ გაჩეჩილაძე აცხადებს, მისი დაცვის ქვეშ მყოფი წარდგენილ ბრალს არ აღიარებს და ამ ეტაპზე დუმილის უფლებას იყენებს.
„საქმის მასალები გადმომეცა, გავეცნობით და ამის შემდეგ ჩამოვაყალიბებთ პოზიციას. ის ამ ეტაპზე დუმილის უფლებას იყენებს, ეს იყო წმინდა წყლის შემთხვევა, ყოველგვარი განზრახვა არის გამორიცხული“, – განაცხადა ადვოკატმა.
შეგახსენებთ, რომ შინაგან საქმეთა სამინისტროს თბილისის პოლიციის დეპარტამენტის საგამოძიებო მთავარი სამმართველოს თანამშრომლებმა, ცხელ კვალზე ჩატარებული ოპერატიულ-სამძებრო და საგამოძიებო მოქმედებების შედეგად, 1999 წელს დაბადებული გიორგი ახლოური ოჯახის წევრის მიმართ ჩადენილი განზრახ მკვლელობის ბრალდებით დააკავეს.
უწყების ინფორმაციით, ბრალდებულმა ძმას – 2001 წელს დაბადებულ მიშა ახლოურს, ურთიერთშელაპარაკების ნიადაგზე, ცივი იარაღის გამოყენებით სხეულზე ჭრილობა მიაყენა. დაჭრილი მამაკაცი სასწრაფო სამედიცინო დახმარების ჯგუფმა საავადმყოფოში გადაიყვანა, თუმცა მისი გადარჩენა ვეღარ მოხერხდა. სამართალდამცველებმა დანაშაულის ჩადენის იარაღი – დანა ნივთმტკიცებად ამოიღეს.
