გაერთიანებულმა სამეფომ კორონავირუსით დაინფიცირებული პაციენტების რაოდენობით საფრანგეთს გაუსწრო

გაერთიანებულმა სამეფომ კორონავირუსით დაინფიცირებული პაციენტების რაოდენობით საფრანგეთს გაუსწრო და ევროპის კონტინენტზე პირველ ადგილზე იმყოფება. შესაბამის მონაცემებს პლატფორმა Worldometers ავრცელებს.

პლატფორმის მიხედვით, ამჟამად სამეფოში ინფიცირებულ პაციენტთა რაოდენობა 2 713 000-ს აღემატება, გარდაცვლილთა რიცხვი კი, 75 431-ს შეადგენს. 4 იანვარს, გაერთიანებული სამეფოს პრემიერ-მინისტრმა ბორის ჯონსონმა განაცხადა, რომ ინგლისში ახალი საყოველთაო „ლოქდაუნი“ ამოქმედდება, რომელიც სულ მცირე თებერვლის შუა რიცხვებამდე გაგრძელდება.

ახალი შეზღუდვების თანახმად, მოქალაქეები ვალდებულები არიან სახლში დარჩნენ და აუცილებელი შემთხვევების გარდა საცხოვრებელი არ დატოვონ. ამასთან, სკოლები და კოლეჯები იხურება და სწავლა დისტანციურ რეჟიმში გაგრძელდება. რესტორნებს შეუძლიათ მომხმარებლებს საკვების მიწოდების სერვისით მოემსახურონ. იხურება გოლფის მოედნები, ჩოგბურთის კორტები და ღია ტიპის სპორტდარბაზები.

ახალ შეზღუდვებზე საუბრისას ბორის ჯონსონმა განაცხადა, რომ მომავალი კვირები ურთულესი იქნება.