სერგო ჩიხლაძე – მთავარია მოლაპარაკებები გაგრძელდეს და მეხუთე რაუნდი დაგვანახებს, რა პერსპექტივა აქვს მოლაპარაკებებს

ოპოზიციის, ფასილიტატორი ელჩების მხრიდან მზაობა არის, რომ იანვარში შედგეს მორიგი რაუნდი,- ამის შესახებ ჟურნალისტებთან სტრატეგია აღმაშენებლის ერთ-ერთმა ლიდერმა სერგო ჩიხლაძემ განაცხადა.

როგორც მან აღნიშნა, მეხუთე რაუნდით გამოიკვეთება რა პერსპექტივა აქვს მოლაპარაკებებს.

„გონივრული ვადა არის რა თქმა უნდა, რომ იანვარში მოხერხდეს მორიგი რაუნდის ჩატარება. დიდი იმედი გვაქვს, რომ ხელისუფლება აცნობიერებს მდგომარეობის სიმძიმეს ყოველდღიურად ქვეყანა სულ უფრო და უფრო ჩიხში შედის და ეს პირველ რიგში ჩვენს ქვეყანას სჭირდება, რომ დროზე მოგვარდეს ეს საკითხი და დავიწყოთ კრიზისიდან გამოსვლა. შესაბამისად, მზაობა ოპოზიციის, ფასილიტატორი ელჩების მხრიდან არის, რომ იანვარში მოგვარდეს და შედგეს მორიგი რაუნდი, რომ გაგრძელდეს მოლაპარაკებები, იმედი გვაქვს რომ ხელისუფლებაც ამას აცნობიერებს და ისინიც მზად არიან, რომ მოლაპარაკებები აწარმოონ და გაგრძელდეს. რა თქმა უნდა, ერთ რაუნდში და ერთი შეხვედრით არ გვაქვს იმედი, რომ ყველაფერი მოგვარდება, მაგრამ მთავარია გაგრძელდეს მოლაპარაკებები და მეხუთე რაუნდი დაგვანახებს, რა პერსპექტივა აქვს ამ მოლაპარაკებებს“, – განაცხადა ჩიხლაძემ.

მისივე თქმით, სერბულ მოდელთან დაკავშირებით ოპოზიციაში სერიოზული მსჯელობა არ ყოფილა. მისივე თქმით, ოპოზიციამ გონივრული წინადადებები უკვე წარადგინა და ახლა ყველაფერი ხელისუფლების პოზიციაზეა დამოკიდებული.

„სერბულ მოდელზე განხილვა და სერიოზული მსჯელობა არ გვქონია, ჯერჯერობით ყველაფერი დამოკიდებულია იმაზე, თუ რა შემხვედრი წინადადებით მოვა “ქართული ოცნების” წარმომადგენელი მოლაპარაკებებზე“, – განაცხადა ჩიხლაძემ.