აშშ-ში საარჩევნო კოლეგიამ დაადასტურა ბაიდენის პრეზიდენტობა, გადადგა გენერალური პროკურორი უილიამ ბარი

აშშ-ის საარჩევნო კოლეგიამ დაადასტურა ჯო ბაიდენის გამარჯვება საპრეზიდენტო არჩევნებში. პარალელურად, აშშ-ის გენერალურმა პროკურორმა, უილიამ ბარმა გადადგომის შესახებ დაწერა განცხადება პრეზიდენტ დონალდ ტრამპთან დაძაბულობის ფონზე, არჩევნების გაყალბების შესახებ პრეზიდენტის უსაფუძვლო განცხადებების გამო.
ბარის გადადგომის შესახებ ტრამპმა ტვიტერით დაწერა 14 დეკემბერს, ბართან თეთრ სახლში გამართული შეხვედრის შემდეგ. მან გამოაქვეყნა ბარის განცხადება გადადგომაზე და მიაწერა, რომ “ძალიან კარგი შეხვედრა” ჰქონდა ბართან – რომელიც პრეზიდენტის ყველაზე ერთგულ მოკავშირედ ითვლებოდა. ბარის ბოლო სამუშაო დღე 23 დეკემბერი იქნება. ტრამპი ამბობს, რომ მას ბართან “ძალიან კარგი” ურთიერთობა ჰქონდა – თუმცა მიმდინარე თვეში ტრამპის გაბრაზება გამოიწვია ბარის განცხადებამ, რომ იუსტიციის სამინისტრომ ვერ მიაგნო მტკიცებულებებს არჩევნების მასშტაბური გაყალბებისა, რაც შეცვლიდა არჩევნების შედეგს. ტრამპი ასევე უკმაყოფილო იყო იუსტიციის სამინისტროს უარით არჩევნებამდე საჯაროდ გამოეცხადებინა რომ გამოძიებას აწარმოებდა ჯო ბაიდენის შვილის, ჰანტერის გარშემო.
ბარის გადადგომის შესახებ ცნობებს ცოტა ხნით უსწრებდა ინფორმაცია, რომ აშშ-ის საარჩევნო კოლეგიამ ფორმალურად დაადასტურა ჯო ბაიდენის გამარჯვება 3 ნოემბრის არჩევნებში.