ელგუჯა ბაგრატიონი – აჭარის უმაღლეს საბჭოში არცერთი ოპოზიციური პარტიის წევრი არ შედის
აჭარის უმაღლეს საბჭოში არცერთი ოპოზიციური პარტიის წევრი არ შედის,- ამის შესახებ “ერთიანი ნაციონალური მოძრაობის” წევრმა ელგუჯა ბაგრატიონმა განაცხადა.
მისი ინფორმაციით, ოპოზიცია ხალხის ერთგული რჩება და მოთხოვნა უცვლელია, რაც არის ხელახალი საპარლამენტო არჩევნების ჩატარება.
მისივე თქმით, დღეს ოპოზიციონერი დეპუტატები სიების განულებასთან დაკავშირებით მიმართავენ.
“როგორც საქართველოს პარლამენტში არ შევიდა არცერთი ოპოზიციური ძალა, აჭარის უმაღლეს საბჭოშიც არ შედის არცერთი ოპოზიციონერი დეპუტატი, სადაც “რუსული ოცნების” საბჭოთა დეპუტატები დასხდებიან და საკუთარი კეთილდღეობისთვის იზრუნებენ. რა თქმა უნდა, ჩვენ ვრჩებით ჩვენი ხალხის ერთგული და არცერთი არ ვაპირებთ უმაღლეს საბჭოში შესვლას.
დღეს მივმართავთ სიების განულებით და ამის შემდეგ, როგორც კი სიები განულდება, უმაღლესი საბჭოს ყველა ოპოზიციონერი დეპუტატი, ვინც მანდატი მიიღო, დაწერს განცხადებას და დატოვებს “რუსულ ოცნებას” იმ საბჭოთა უმაღლეს საბჭოში, რომელიც უახლოეს დღეებში შეიკრიბება.
დღეს უკვე 40 დღეა, რაც აქციები მიმდინარეობს, ეს აქციები გაგრძელდება უწყვეტ 24 – საათიან რეჟიმში და იქნება იქამდე, ვიდრე არ იქნება ის მოთხოვნები დაკმაყოფილებული, რაც აქვს საქართველოს თავისუფალ, დამოუკიდებელ მოსახლეობას”, – განაცხადა ელგუჯა ბაგრატიონმა.
