ზაალ უდუმაშვილი – ოპოზიციამ უკვე დაამტკიცა, რომ თავისი ერთობით შეუძლია გამარჯვების მიღწევა

ოპოზიციამ უკვე დაამტკიცა, რომ თავისი ერთობით შეუძლია გამარჯვების მიღწევა და ზუსტად ასე, ჩვენი სიმტკიცით მივალთ იქამდე, რომ დაინიშნება და ჩატარდება ისეთი არჩევნები, რომლის მიმართაც არ იქნება დასმული კითხვები სასამართლოს მხრიდან,- ამის შესახებ „ნაციონალური მოძრაობის” წევრმა ზაალ უდუმაშვილმა „ინტერპრესნიუსს” მოსწავლე ახალგაზრდობის სასახლის ბაღში განუცხადა, სადაც ამ წუთებში ოპოზიციის წარმომადგენლები იკრიბებიან.

როგორც უდუმაშვილმა აღნიშნა, აქედან რამდენიმე მეტრში იჯდება ივანიშვილის ერთპარტიული პარლამენტი, რომელიც ჩაბღაუჭებულია ძალაუფლებას და ყველა მეთოდით ცდილობს შეინარჩუნოს ხელისუფლება, პარალელურად კი ამ ბაღში იქნება ოპოზიციცია, რომელიც აღჭურვილია ამომრჩევლის მანდატით.

„ჩვენი გეგმა უკვე დიდი ხანია გაცხადებული. ამ დღეს შევიკრიბებით ყველა ოპოზიციური პარტია, რომელიც თვლის, რომ დღეს შექმნილი პოლიტიკური კრიზისიდან ერთადერთი გამოსავალი არის ახალი არჩევნები. დღეს ჩვენი მოსახლეობა ნახავს იმ რეალობას, რომელიც არის ქვეყანაში. აქედან რამდენიმე მეტრში იჯდება ივანიშვილის ერთპარტიული პარლამენტი, რომელიც ჩაბღაუჭებულია ძალაუფლებას და ყველა მეთოდით ცდილობს შეინარჩუნოს ხელისუფლება, თუმცა, ეს დროებითია. პარალელურად კი ამ ბაღში იქნება ოპოზიცია, რომელიც აღჭურვილია ამომრჩევლის მანდატით. ეს არის განსხვავება ამ ორ შეკრებას შორის. ოპოზიციამ უკვე დაამტკიცა, რომ თავისი ერთობით შეუძლია გამარჯვების მიღწევა და ზუსტად ასე ჩვენი სიმტკიცით მივალთ იქამდე, რომ დაინიშნება და ჩატარდება ისეთი არჩევნები, რომლის მიმართაც არ იქნება დასმული კითხვები სასამართლოს მხრიდან”,- განაცხადა ზაალ უდუმაშვილმა.

მისივე თქმით, ოპოზიციას არ აქვს დღეს გეგმა, რომ პარლამენტის შენობასთან შეკრებილ სამოქალაქო აქტივისტებს შეუერთდნენ.

„იქ დამოუკიდებლად მიმდინარეობს აქცია და ვფიქრობ, ეს სწორია. ყველამ უნდა დაინახოს ის დეპუტატი, რომელიც „კომუნისტური პარტიის“ წევრია და არა “ქართული ოცნების”. თუმცა, ალბათ, ეს ერთიდაიგივეა. ისინი ასე ურცხვად დასხდებიან ერთპარტიულ პარლამენტში.

რაც შეეხება მოლაპარაკებებს, ზუსტად არ ვიცი, შემდეგი რაუნდი როდის გაიმართება, მაგრამ ალბათ ჩაინიშნება. მოლაპარაკებები ნებისმიერ შემთხვევაში გაგრძელება მიუხედავად მუქარის და შანტაჟისა, რომელიც “ქართული ოცნების” მხრიდან ისმის და დღეიდან მათი ტონიც შეიცვლება ამ მოლაპარაკებების დროს, რადგან ნამდვილად არ აქვთ დიდი დრო დარჩენილი. თუკი არის შერჩენილი საღი აზრი, რომ ქვეყანამ პოლიტიკური კრიზისი დაძლიოს, მაშინ უნდა მოვიდნენ იმ წინადადებაზე თანხმობით, რაც ახალი არჩევნების ჩატარებას გულისხმობს”,- განაცხადა უდუმაშვილმა.

ცნობისთვის, მოსწავლე ახალგაზრდობის სასახლის ბაღში, ოპოზიციური პარტიები, საქართველოს პარლამენტში, პარტიული სიების და უფლებამოსილების შეწყვეტასთან დაკავაშირებით მემორანდუმს ხელს მოაწერენ.

ისინი ადგილზე უკვე იკრიბებიან, სადაც გადაწყვეტილების გაფორმება მოხდება.

უკვე ცნობილია, რომ საპარლამენტო მანდატებზე უარს ამბობს და სიას ხსნის „ნაციონალური მოძრაობა“, „ევროპული საქართველო“, „სტრატეგია აღმაშენებელი“, „ლელო“ და “ლეიბორისტული პარტია”. ცერემონიაში მონაწილეობას არ მიიღებს “გირჩი”. მანდატებს ინარჩუნებს ალეკო ელისაშვილის “მოქალაქეები”.

აღნიშნული გადაწყვეტილება მას შემდეგ მიიღეს, რაც ხელისუფლებასა და ოპოზიციას შორის მოლაპარაკებებს 4 რაუნდი უშედეგოდ დასრულდა

interpressnews