ირანული მედია – მოჰსენ ფახრიზადეს მკვლელობა დისტანციურად, სატელიტური კონტროლის, ხელოვნური ინტელექტისა და სახის ამოცნობის სისტემის საშუალებით განხორციელდა
ირანელი მეცნიერის მოჰსენ ფახრიზადეს მკვლელობა დისტანციურად, სატელიტური კონტროლის, ხელოვნური ინტელექტისა და სახის ამოცნობის სისტემის საშუალებით განხორციელდა, – ირანული მედიის ინფორმაციით, ამის შესახებ ქვეყნის ოფიციალურმა სამხედრო პირებმა განაცხადეს.
ირანის რევოლუციის გუშაგთა კორპუსის პრესსპიკერის ბრიგადის გენერალ რამაზან შარიფის თქმით, მკვლელობის დროს გამოიყენეს „ელექტრონული ხელსაწყო”, რომელიც „სატელიტური მოწყობილობის” საშუალებით გააკონტროლეს.
ირანული მედიის ინფორმაციით, ირანის რევოლუციის გუშაგთა კორპუსის ხელმძღვანელის მოადგილემ სარდმა ალი ფადავმა განაცხადა, რომ მკვლელობა განხორციელდა ხელოვნური ინტელექტისა და სახის ამოცნობის სისტემის საშუალებით. მისივე თქმით, თავდამსხმელები ადგილზე არ იმყოფებოდნენ და თავდასხმის იარაღის მართვა სატელიტის საშუალებით განხორციელდა.
შეგახსენებთ, ირანელი მეცნიერი მოჰსენ ფახრიზადე 27 ნოემბერს მოკლეს. თეირანი მკვლელობაში ისრაელს ადანაშაულებს.
interpressnews
