ირაკლი ოქრუაშვილი – ამას, რასაც ბოლო ერთი წელია ვუყურებთ, პოლიცია არ ჰქვია, ივანიშვილის კერძო დაცვის კომპანია გახდა

„ამას, რასაც ბოლო ერთი წელია ვუყურებთ, პოლიცია არ ჰქვია, ეს ივანიშვილის კერძო დაცვის კომპანია გახდა“, – აცხადებს „გამარჯვებული საქართველოს“ ლიდერი ირაკლი ოქრუაშვილი და გუშინ ცესკოსთან განვითარებულ მოვლენებს ეხმაურება.

ოქრუაშვილის განცხადებით, გუშინ გაფრთილება არ ყოფილა წყლის ჭავლი ისე გამოიყენეს.

„პინოჩეტის, ნორიეგას თუ სხვების სადამსჯელო რაზმებსაც პოლიცია ერქვა სხვა კი არაფერი. ამას, რასაც ბოლო ერთი წელია ვუყურებთ, პოლიცია არ ჰქვია. ეს ივანიშვილის კერძო დაცვის კომპანია გახდა. ივანიშვილთან “ზედმეტი” თუ “ფსევდო” კანონმორჩილური რიტორიკით და ქცევით ვერაფერს გავხდებით სანამ ადეკვატურად არ შევხედავთ ამ ყველაფერს.

მოქმედებაა საჭირო და არა სისულელეები – გაფრთილება არ ყოფილა წყალი ისე გამოიყენეს და ა.შ. 20 ივნისს რაღაც ხომ უნდა ესწავლებინა?“ – წერს ირაკლი ოქრუაშვილი სოციალურ ქსელში.

რაც შეეხება ცესკოსთან განვითარებულ მოვლენებს, ცენტრალურ საარჩევნო კომისიასთან პოლიციამ აქციის მონაწილეების წინააღმდეგ დროის სხვადასხვა მონაკვეთში წყლის ჭავლი გამოიყენა. ცესკოს ტერიტორიის მომიტინგეებისგან გასათავისუფლებლად პროცესში ჩართული იყო სპეცრაზმიც.

წყლის ჭავლის რამდენჯერმე გამოყენების მიუხედავად, აქციის მონაწილეები ცესკოსთან ბრუნდებოდნენ, თუმცა საბოლოოდ, ოპოზიციონერი ლიდერების გადაწყვეტილებით, წუხელ ღამით ცენტრალურ საარჩევნო კომისიასთან აქცია დასრულდა.

interpressnews