სერგი კაპანაძის განცხადებით, ხელისუფლება კორონავირუსით დაავადებულთა რაოდენობით მანიპულირებს და ამით აპირებს მოსალოდნელი შეზღუდვების გამართლებას

„ევროპული საქართველოს“ ერთ-ერთი ლიდერის, სერგი კაპანაძის განცხადებით, ხელისუფლება კორონავირუსით დაავადებულთა რაოდენობით მანიპულირებს და ამით აპირებს მოსალოდნელი შეზღუდვების გამართლებას. კაპანაძის განმარტებით, ამ შეზღუდვების მთავარი ამოცანა არა ეპიდემიოლოგიური მდგომარეობის კონტროლი, არამედ ისაა, რომ მოსახლეობა ქუჩაში საპროტესტო აქციაზე არ გამოუშვან.

ამასთანავე, სერგი კაპანაძემ განმარტა, რომ ოპოზიცია კვირას პარლამენტი წინ მისულ პროტესტის მონაწილეებს პირბადეებსა და სადეზინფექციო საშუალებებს დაურიგებს და ყველა ზომის დაცვას შეეცდება იმისთვის, რომ ეპიდემიოლოგიური ვითარება არ გამწვავდეს.

„ჩვენ არჩევნებამდეც გვქონდა ზუსტი ინფორმაცია, რომ გახარია და ზოგადად „ქართული ოცნება“ აპირებდა კორონას პანდემია შემდგომში, ხალხის გარეთ გამოსვლის შეჩერებისთვის გამოეყენებინა და მოეხდინა ჩაკეტვა. არჩევნებამდე ისინი ისევ და ისევ რიცხვებით მანიპულირებდნენ, თითქოს დააგდეს დაავადებულთა რაოდენობა და ახლა აწიეს, არჩევნების შემდეგ. როგორც ჩანს, ამით აპირებენ, გაამართლონ შეზღუდვები, რომლის მთავარი ამოცანა არის არა ეპიდემიოლოგიური მდგომარეობის კონტროლი, არამედ ის, რომ ხალხი არ გამოვიდეს გარეთ. ჩვენ ყველა თანამოქალაქეს მოვუწოდებთ, რომ 8 ნოემბერს გამოხატონ თავიანთი ბრაზი პარლამენტთან მოსვლით. ჩვენ ყველა ადამიანს დავურიგებთ პირბადეს, ვინც იქ მოვა და ასევე, ხელის სანიტაიზერებს. შევეცდებით, რომ ყველა ზომა იყოს დაცული იმისთვის, რომ ეპიდემიოლოგიური მდგომარეობა არ გამწვავდეს, მაგრამ ასევე, ყველას კარგად უნდა ესმოდეს, რომ კორონას ზურგსუკან ამოფარება არ გამოუვათ მაშინ, როდესაც საქმე ეხება ფუნდამენტურ საკითხს – ეს არის არჩევნებში გაყალბების შედეგად ისეთი გუნდისთვის მანდატის მიცემა, რომელსაც ეს მანდატი არ მოუპოვებია,“- განაცხადა კაპანაძემ.

შეგახსენებთ, რომ პრემიერ-მინისტრ გიორგი გახარიას ვარაუდით, ოპოზიციის აქციები „დააჩქარებს ჩვენთან პიკის მოსვლას და უფრო მძიმე სიტუაცია იქნება, ვიდრე ველოდით“. გახარია არ გამორიცხავს, რომ ოპოზიური სპექტრის აქტივობის გამო გადასახედი გახდეს წერტილოვანი შეზღუდვების ეფექტურობა.

კორონავირუსმა მუტაცია განიცადა – “დანიაში შიშობენ, რომ ეს შტამი შეიძლება მთელ მსოფლიოში გავრცელდეს”
INTERPRESSNEWS