ბათუმის მე-19 საარჩევნო უბნის შედეგებს ხელახლა დათვლიან

ბათუმის საარჩევნო ოლქში ხელახლა დათვლიან 31 ოქტომბერს, კენჭისყრის დღეს მე-19 უბანზე მიცემულ ხმებს.

გადაწყვეტილება მიიღეს საოლქო საარჩევნო კომისიის სხდომაზე, რომელიც 4 ნოემბერს გვიან ღამემდე საჩივრებს განიხილავდა ოპოზიციის საპროტესტო აქციის ფონზე.

სხდომა პროტესტის ნიშნად დატოვეს „ნაციონალური მოძრაობა-გაერთიანებული ოპოზიციის“ წარმომადგენლებმა. მათი განცხადებით, კომისიამ გადაწყვიტა ხმები ხელახლა დათვალოს მხოლოდ იმ უბანზე, სადაც გაერთიანებული ოპოზიცია იმარჯვებს.

ამომრჩეველთა ხმების შეჯამებისას ყველაზე დიდი დისბალანსი ბათუმის მე-19 უბანზე შედგენილ ოქმში აღმოჩნდა. ეს ოქმი სოციალურ ქსელშიც გავრცელდა და აქტიური განხილვის საგნად იქცა.

მე-19 უბნის ოქმი ბათუმის საოლქო საარჩევნო კომისიაში გაასაჩივრა „საქართველოს ახალგაზრდა იურისტთა ასოციაციამ“. ამ ორგანიზაციამ სხვადასხვა დარღვევის გამო, სულ 20 საჩივარი დაწერა. “სამართლიანმა არჩევნებმა” 12.

გაერთიანებულმა ოპოზიციამ ბათუმის 120 საარჩევნო უბნიდან 119-ის ოქმები გაასაჩივრა.
ბათუმის საოლქო საარჩევნო კომისიამ 4 ნოემბერს საჩივრების მხოლოდ ნაწილი განიხილა. ეს პროცესი დღეს, 5 ნოემბერს გაგრძელდება.

ბათუმის 79-ე საოლქო საარჩევნო კომისიის თავმჯდომარის, ციალა შავაძის განცხადებით, ტექნიკური ხარვეზები, რაც საუბნო კომისიებმა დაუშვეს, შესაძლოა, ბევრი მიზეზით იყოს განპრიობებული: „მაგალითად, პანდემიამ მუშაობაში ძალიან შეგვიშალა ხელი, რადგან ჩვენი დატრენინგებული კომისიის წევრთა 80 პროცენტი საუბნო კომისიებში აღარ იყვნენ, წინა დღეებში კომისიის წევრები შეიცვალნენ და ძალიან ბევრს კოვიდინფექცია დაუდასტურდა და ამანაც მოახდინა უბნების მუშაობაზე გავლენა“.

radiotavisupleba