ნინო ბურჯანაძე – ნიკა მელიას დაკავება ცეცხლზე ნავთის დასხმა იქნება – ხელისუფლება ყველას ვერ დაგვიჭერს

„ერთიანი საქართველოს” ლიდერი ნინო ბურჯანაძე ხელისუფლებას მოუწოდებს, „ნაციონალური მოძრაობის” ლიდერის, ნიკა მელიას დაკავებით სიტუაცია კიდევ უფრო არ გაამწვავოს. როგორც ბურჯანაძემ ჟურნალისტებს განუცხადა, მელიას დაკავება “ცეცხლზე ნავთის დასხმა” იქნება.

„ნიკა მელია თავიდანვე უკანონოდ იყო დაკავებული. რაც მისი მისამართით განხორციელდა, ეს იყო უსინდისობა და უკანონობა. ის სამაჯურიც ამდენი ხანი ტყუილად ატარა მელიამ, რადგან სამაჯური პოლიტიკური დევნის მაჩვენებელი იყო. მოვუწოდებ ხელისუფლებას, არ გაამწვავოს პროცესი. ეს მხოლოდ და მხოლოდ ცეცხლზე ნავთის დასხმა იქნება. ხელისუფლებას უნდა ესმოდეს, რომ ყველას ვერ დაგვიჭერს. ყველას თუ დაგვიჭერს, ჩვენს შემდეგ კიდევ დარჩებიან ადამიანები, რომლებიც ყველაფერს გააკეთებენ იმისთვის, რომ ეს ხელისუფლება რაც შეიძლება მალე მოშორდეს ქვეყანას. სჯობს, რომ ეს პროცესი იყოს ცივილიზებულ კალაპოტში და ხელისუფლებამ ცეცხლზე ნავთი არ დაასხას”,-განაცხადა ბურჯანაძემ.

ცნობისთვის, გენერალურმა პროკურატურამ „ნაციონალური მოძრაობის“ ერთ-ერთი ლიდერის, ნიკა მელიასთვის აღკვეთის ღონისძიების შეცვლასთან დაკავშირებით საქალაქო სასამართლოს მიმართა. პროცესი 17:00 საათზეა დანიშნული.

შეგახსენებთ, ნიკა მელიას 20 ივნისის საქმეზე აღკვეთის ღონისძიების სახით გირაო აქვს შეფარდებული. ასევე, სასამართლოს გადაწყვეტილებით, მას ელექტრონული სამაჯური ეკეთა, თუმცა „ნაციონალური მოძრაობის“ ერთ-ერთმა ლიდერმა, პროკურატურის მიერ დამაგრებული ელექტრონული სამაჯური 1-ელ ნოემბერს, საჯაროდ, რუსთაველის გამზირზე მიმდინარე საპროტესტო აქციაზე მოიხსნა.

interpressnews