წლის ბოლომდე რუსეთის მოსახლეობა 352 000 კაცით შემცირდება

კორონავირუსის პანდემიის ფონზე, რუსეთის მოსახლეობა წლის ბოლომდე 352 ათასი კაცით შემცირდება, რაც 10-ჯერ მეტია შარშანდელ წელთან შედარებით.

ამის თაობაზე ლაპარაკია სახელმწიფო პროექტის ბოლო ვერსიაში, სახელწოდებით “რუსეთის ფედერაციის განვითარების ეროვნული მიზნები 2030”.

მოსახლეობის უფრო მასშტაბური შემცირების ტენდენციას რუსეთში ადგილი ჰქონდა 2006 წელს. ამასთან, ეროვნული მიზნების პროექტის წინანდელ ვარიანტში ნავარაუდევი იყო რუსეთის მოსახლეობის შემცირება მხოლოდ 158 ათასით, რასაც მომდევნო ორ წელიწადში ზრდა უნდა მოჰყოლოდა.

ახალი ოფიციალური პროგნოზის თანახმად, 2020-2024 წლებში რუსეთის მოსახლეობა, ჯამში, სულ მცირე, მილიონ 200 000 კაცამდე შემცირდება.

რუსეთის ეკონომიკის სამინისტროში აცხადებენ, რომ ერთიანი გეგმა ჯერ კიდევ დამუშავების სტადიაშია. შრომის სამინისტრო კი გეგმის დამტკიცებამდე დასკვნების გაკეთებას ნაადრევად მიიჩნევს.

ოფიციალური ცნობით, კორონავირუსის პანდემიის განმავლობაში, საშიში ვირუსისგან რუსეთში აპრილ-აგვისტოს შუალედში 45 663 კაცი დაიღუპა.

radiotavisupleba