დისტანციურიდან საკლასო ოთახებში სწავლას დაუბრუნდა მოსწავლეთა კიდევ ერთი ნაწილი

1 ოქტომბრიდან სწავლას საკლასო ოთახებში აგრძელებენ დღემდე დისტანციური სწავლების რეჟიმზე მყოფი სკოლების I-VI კლასების მოსწავლეები, გარდა აჭარის რეგიონისა. კორონავირუსის შემთხვევების სიმრავლის გამო, აჭარის მუნიციპალიტეტების სკოლები დისტანციური სწავლების რეჟიმზე რჩებიან.

საკლასო ოთახებში ბრუნდებიან თბილისის, რუსთავის, ქუთაისის და ზუგდიდის სკოლების I-VI კლასების, ხოლო ფოთსა და გორში თორმეტივე კლასის მოსწავლეები. ამ ქალაქებში 15 სექტემბრიდან სწავლა ისევ დისტანციური რეჟიმით მიმდინარეობდა საქართველოში კორონავირუსის შემთხვევების მკვეთრად მომატების გამო.

ფოთის და გორის გარდა, ზედა კლასების მოსწავლეები ისევ დისტანციურ რეჟიმზე რჩებიან. მათი კლასებში დაბრუნების თარიღი ჯერჯერობით უცნობია.

განათლების სამინისტროს ინფორმაციით, თბილისის, ზუგდიდის, ქუთაისის და რუსთავის I-VI კლასების მოსწავლთა მშობლებს შეუძლიათ შვილებისთვის ისევ დისტანციური სწავლება მოითხოვონ.

რადიო თავისუფლება