აქტიური რეზერვის შესახებ მოქალაქეებთან საინფორმაციო შეხვედრა დაიწყო

საქართველოს თავდაცვის სამინისტრო რეზერვის პროგრამას განაგრძობს. როგორც „ინტერპრესნიუსს“ თავდაცვის სამინისტროდან აცნობეს, დღეს თბილისში საქართველოს თავდაცვის სამინისტროს ტერიტორიული რეზერვის პროგრამის შესახებ მოქალაქეებთან საინფორმაციო შეხვედრა დაიწყო.

მათივე ცნობით, საქართველოს ეროვნული გვარდიის წარმომადგენლები, სხვადასხვა მეტროსადგურთან მოქალაქეებს შეხვდნენ და აქტიური რეზერვის შესახებ ინფორმაცია მიაწოდეს.

„სამხედრო მოსამსახურეებმა პროგრამით დაინტერესებულ პირებს რეზერვის პირობები დეტალურად გააცნეს და ქვეყნის თავდაცვისუნარიანობის განვითარებისათვის მისი მნიშვნელობის შესახებ ესაუბრნენ. ტერიტორიული რეზერვის შესახებ ქვეყნის მასშტაბით საინფორმაციო შეხვედრები მოქალაქეებთან მომავალშიც გაგრძელდება.

ტერიტორიულ რეზერვში მიიღებიან თბილისის, მცხეთის, აჭარის, გურიის, სამეგრელო-ზემო სვანეთისა და კახეთის რეგიონებში მცხოვრები 18-50 წლამდე ასაკის მოქალაქეები. აქტიურ რეზერვში მიღება ნებაყოფლობითი და ანაზღაურებადია.

რეზერვისტთან გაფორმდება 5-წლიანი კონტრაქტი და მას შეუნარჩუნდება სამოქალაქო სამსახური. საბრძოლო მომზადება თითოეული წლის განმავლობაში შეადგენს არაუმეტეს 45 დღისა. რეზერვისტის მინიმალური წლიური ანაზღაურება 2700 ლარია.

18-დან 22 წლის ჩათვლით სტუდენტები, სარეზერვო სამსახურის ერთი კონტრაქტის ვადის გავლის შემდეგ, სავალდებულო სამხედრო სამსახური მოხდილად ჩაეთვლებათ“, – აღნიშნულია ინფორმაციაში.

ცნობისთვის, საბუთები მიიღება ყოველ სამუშაო დღეს 10:00 საათიდან 16:00 საათამდე, შემდეგ მისამართებზე: ქ. თბილისში, ქ. თელავში, ქ. ბათუმში, და ქ. სენაკში. ონლაინ რეგისტრაცია შესაძლებელია მისამართზე: onlinebct.mod.gov.ge. ცხელი ხაზი: 595 05 06 85, 032 2 75 26 44.

interpressnews