გიგა ბოკერია – ზურაბ ჯაფარიძის მხარდაჭერა საჯაროდ უკვე დავაფიქსირეთ, ასევე მომხრე ვართ საბურთალოზე პოზიციების შეჯერების, მათ შორის, ირაკლი ოქრუაშვილის კანდიდატურაზე

ზურაბ ჯაფარიძის მხარდაჭერა ჩვენ უკვე საჯაროდ დავაფიქსირეთ, ასევე მომხრე ვართ საბურთალოზე პოზიციების შეჯერების, მათ შორის, ირაკლი ოქრუაშვილის კანდიდატურასთან დაკავშირებით,- ამის შესახებ „ევროპული საქართველოს” ერთ- ერთმა ლიდერმა გიგა ბოკერიამ ჟურნალისტებს „ლეიბორისტული პარტიის” ოფისში შეხვედრის დაწყებამდე განუცხადა.
კითხვაზე, განიხილება თუ არა საბურთალოზე სხვა კანდიდატურაც, ბოკერია ამბობს, რომ სხვა კანდიდატურის შესახებ მას არ სმენია.
მისივე თქმით, სწორედ ამისთვის შეიკრიბნენ ოპოზიციური პარტიები, რომ თბილისთან დაკავშირებით ვითარება გაირკვეს. ბოკერიას განცხადებით, ასევე მნიშვნელოვანია დეკლარაცია, რომელსაც ოპოზიციური პარტიები დღეს მიიღებენ.
„ხმების დაცვის მექანიზმთან დაკავშირებით, ბევრი ტექნიკური იდეა არსებობს, მაგრამ მთავარია პრინციპი, რომელიც მდგომარეობს იმაში, რომ ამ პოლიტიკური ძალებისთვის, რომელიც აპირებს ამ დეკლარაციას შეუერთდეს, მიდგომა იქნება განსხვავებული – ის კი არა, რომ ჩემი ხმები დავიცვა, რაც ბუნებრივია, პირველი ინსტიქტია ყველა პოლიტიკური ძალის, არამედ, რომც არ იყოს კონკრეტულ ადგილზე ძლიერად წარმოდგენილი რომელიმე პოლიტიკური პარტია, ფუნდამენტური ინტერესი იქნება, რომ ყველა ხმის დაცვა მოხდეს და თანაბრად იყოს ყურადღება განაწილებული. ამას სჭირდება ადგილზე კომუნიკაცია და კოორდინაცია. ეს დეკლარაცია იმიტომ არის მნიშვნელოვანი, რომ პარტიები არიან ერთმანეთის კონკურენტები და კონკურენციის დროს, ხშირად არის ხოლმე მწვავე დაპირისპირება, რაც ნორმალურია, ოღონდ ამ ლეგიტიმურმა კონკურენციამ და აზრთა სხვადასხვაობამ არ უნდა შეგვიშალოს ხელი ამ საკითხთან დაკავშირებით კოორდინაციაში, რადგან ეს არის ჩვენი ქვეყნის ინტერესი,”- განაცხადა ბოკერიამ.

interpressnews