დღეიდან ღია ცის ქვეშ ღონისძიებების ჩატარება შესაძლებელი იქნება

საქართველოში დღეიდან, 13 ივლისიდან მოიხსნება ღია სივრცეში კულტურული ღონისძიებების ჩატარების აკრძალვა.

კორონავირუსის პანდემიის გამო დაწესებული აკრძალვის გაუქმების გადაწყვეტილება მთავრობის 9 ივლისის სხდომაზე გამოაცხადა პრემიერ-მინისტრმა გიორგი გახარიამ. მისი თქმით, ზაფხულში, როცა შიდა ტურიზმი სულ უფრო აქტუალური ხდება, ასეთი ღონისძიებების ჩატარებას დიდი მნიშვნელობა აქვს.

13 ივლისიდან ისევ ნებადართული იქნება ღია ცის ქვეშ სხვა ღონისძიებების გამართვაც. პრემიერ-მინისტრმა მაგალითად მოიყვანა კინოლოგები, რომლებიც გამოფენების ჩატარებას მოითხოვენ. როგორც გახარიამ თქვა, „ჩვენ ოთხფეხა მეგობრებსაც უნდა მივეხმაროთ“ და კინოლოგებს მივცეთ გამოფენების ნორმალურად ჩატარების შესაძლებლობა.

საქართველოში კორონავირუსის გამო საგანგებო მდგომარეობა 21 მარტს გამოცხადდა და 22 მაისამდე გაგრძელდა. დაწესებული შეზღუდვები ეტაპობრივად იხსნება.

რადიოთავისუფლება