გიგი უგულავა – „ოცნება“ თავის ვიწრო პროპაგანდისტულ ტყვეობაშია – ისინი კვლავ ტკბობაში, ნარცისიზმში არიან

„ქართული ოცნება“ თავის ვიწრო პროპაგანდისტულ ტყვეობაშია,- ამის შესახებ “ევროპული საქართველოს” ერთ-ერთმა ლიდერმა გიგი უგულავამ „პალიტრანიუსის“ გადაცემაში Newsroom-ი განაცხადა. გიგი უგულავას მიაჩნია, რომ „ხელისუფლებამ ადეკვატურობა დაკარგა და რეალობას მოწყდა“.

„არსებული მთავრობა, რომელსაც უკვე 8 წლის „სტაჟი“ აქვს, ორი ვადით ისედაც მოძველებულია და მას ჩვენი ტრადიციის მიხედვით, ხალხი ისედაც უშვებს. ის იმ მნიშვნელოვან და მტკივნეულ რეფორმებს ვერ განახორციელებს, რაც ეკონომიკის დასაძლევად არის აუცილებელი, რადგან „ქართული ოცნება“ თავის ვიწრო პროპაგანდისტულ ტყვეობაშია. მათი მთავარი პრობლემა არის ის, რომ რასაც თავიანთ არხებზე გადმოსცემენ, ამის მართლაც სჯერათ. მათი მთავარი პრობლემა არის ის, რომ ლობისტების მიერ დაწერილი და მათი ლობიზმით მიერ მიღებული სტატიები, რომლებიც მათზე იწერება, იჯერებენ და როგორც მოცემულობას ისე იღებენ. ადეკვატურობა დაკარგეს, რეალობას მოწყვეტილები არიან. ჯერ ერთი, არავითარი ხედვა არ აქვთ და მეორე, რაც გასაკეთებელია, იმას უბრალოდ ვერ გააკეთებს „ქართული ოცნება“,-აცხადებს უგულავა.

მისი შეფასებით, ხელისუფლება ღრმა კრიზისშია, რის გამოც შექმნილი ვითარების მოგვარებას ვერ შეძლებს. გიგი უგულავა პარლამენტში პრემიერ-მინისტრ გიორგი გახარიას გუშინდელ გამოსვლასაც გამოეხმაურა და აღნიშნა, რომ მთავრობა ნარცისიზმით არის დაკავებული.

„გუშინ მთავარი მესიჯი იყო ის, რომ მათ არსებული პრობლემა არ ესმით. ისინი კვლავ ტკბობაში, ნარცისიზმში არიან, ვერ ხედავენ და ვერ გრძნობენ. შესაბამისად, ძალიან მარტივია გააჩერო ქვეყანა. ჩვენ ხომ რეალურად ქვეყანა გავაჩერეთ. ხელისუფლებაში როცა ხარ, ერთ ხელს აწევ, გაჩერდება ავტობუსი, მეორე ხელს აწევ, გაჩერდება მეტრო. ქვეყნის გაჩერება ძნელი არ არის, მაგრამ ახლა ამოქოვა, მითუმეტეს, როცა ასე გაჩერებულია, ურთულესი ამოცანაა. გახარიას გუშინდელი გამოსვლის მთელი უბედურება სწორედ ეს იყო, რომ ამის აუცილებლობას ვერ გრძნობს“,-განაცხადა უგულავამ.