ევროპარლამენტი დღეს საქართველოს შესახებ მომზადებულ ანგარიშს განიხილავს

ევროპარლამენტი 19 მაისს საგარეო საქმეთა კომიტეტის სხდომაზე სვენ მიქსერის მიერ მომზადებულ ანგარიშს განიხილავს, რომელიც საქართველოს მიერ ევროკავშირთან გაფორმებული ასოცირების ხელშეკრულების შესრულებას ეხება.
ანგარიშის ავტორია საქართველოს საკითხებზე მუდმივი მომხსენებელი, ესტონელი ევროპარლამენტარი სვენ მიკსერი. ანგარიშს ეფუძნება რეზოლუციის პროექტი. მასში ცვლილებების შეტანის ვადა 20 მაისს იწურება. წინასწარი ინფორმაციით, ევროპარლამენტის სხდომაზე რეზოლუციის პროექტს ივლისში განიხილავენ.
საქართველოს მიერ ასოცირების შეთანხმების შესრულების ანგარიშის მიმოხილვაში აღნიშნულია საქართველოს პროგრესი რეფორმებისა და კანონმდებლობის დახვეწის კუთხით და ოპოზიციასა და ხელისუფლებას შორის 8 მარტს ხელმოწერილი შეთანხმების სახით. თუმცა, როგორც ანგარიში, ასევე რეზოლუციის პროექტი ასახავს არაერთ პრობლემურ საკითხს.
„ევროპარლამენტი შეშფოთებას გამოხატავს ოპოზიციონერი პოლიტიკოსების მისამართით წარმოებული სასამართლოს საქმეების გამო, რომელმაც ხელი შეუწყო უნდობლობის ზრდას და დაძაბულობის გაღრმავებას მმართველ პარტიასა და ოპოზიციას შორის, ასევე ხელი შეუწყო პოლარიზაციას საზოგადოებასა და პოლიტიკაში. ევროპარლამენტი მოუწოდებს საქართველოს პატივი სცეს დამოუკიდებელი სასამართლოს უმაღლეს სტანდარტს და მიუკერძოებელ სასამართლოს, რისი ვალდებულებაც მას აკისრია“, – ნათქვამია განცხადებაში.

ევროპარლამენტი ასევე მოუწოდებს შესაბამის უწყებებს, გადაიხედოს მოსამართლეთა არჩევის პროცედურები და მათ დანიშვნამდე უზრუნველყოფილი იყოს ვენეციის კომისიის რეკომენდაციების შესრულება.
„მწუხარებას გამოვთქვამთ, რომ უზენაესი სასამართლოს მოსამართლეთა შერჩევის პროცედურაში სერიოზული ხარვეზები გამოვლინდა“,-აღნიშნულია დოკუმენტში.