შალვა კიკნაველიძე: გამოწვევების მიუხედავად, ხელისუფლება ყველაფერს აკეთებს ინფრასტრუქტურული პროექტების განსაზღვრულ ვადებში დასასრულებლად

ზესტაფონის მაჟორიტარმა დეპუტატმა, შალვა კიკნაველიძემ, ადგილობრივი ხელისუფლების წარმომადგენლებთან ერთად, ზესტაფონის მუნიციპალიტეტის სოფელ ალავერდში მიმდინარე საავტომობილო გზის სარეაბილიტაციო სამუშაოები დაათვალიერა. უმრავლესობის დეპუტატის განცხადებით, ძალიან მნიშვნელოვანია, რომ ქვეყანაში ინფრასტრუქტურული პროექტები გაგრძელდეს და მოსახლეობას დისკომფორტი არ შეექმნას. “სოფელ ალავერდის გზა ერთ-ერთია იმ პროექტებს შორის, რომელიც დაწესებული რეგულაციების სრულად დაცვით განახლდა. გამოწვევების მიუხედავად, ხელისუფლება ყველაფერს აკეთებს ინფრასტრუქტურული პროექტების განსაზღვრულ ვადებში დასასრულებლად. ალავერდის სასოფლო გზით, ყოველდღიურ რეჟიმში, 200 – მდე ადამიანი სარგებლობს. ამასთანავე, იგი ერთ – ერთი დამაკავშირებელი მონაკვეთია ხარაგაულის მუნიციპალიტეტთან. ამიტომ, ძალიან მნიშვნელოვანია, რომ პროცესი დროულად დასრულდეს და მოქალაქეებს დისკომფორტი არ შევუქმნათ”- განაცხადა შალვა კიკნაველიძემ. ალავერდის საავტომობილო გზის რეაბილიტაციაზე 268879 ლარი იხარჯება. პროექტს რეგიონული განვითარების ფონდი აფინანსებს. უახლოეს პერიოდში, მუნიციპალიტეტში, კიდევ 7 სასოფლო და საქალაქო გზის რეაბილიტაცია დაიწყება.