1-2 კვირაში შესაძლოა, სისხლის პლაზმით მკურნალობის მეთოდი გამოვიყენოთ:ცერცვაძე
”ერთერთი, რაზეც ახლა ვმუშაობთ, ესაა გამოჯანმრთელებული ადამიანების პლაზმის გამოყენება. რამდენიმე ადამიანის პლაზმა, ვინც განაცხადა თანხმობა დონორობაზე, უკვე შეგროვილია. თუმცა, უნდა ითქვას, რომ ეს მხოლოდ სათქმელადაა იოლი, რომ გამოჯანმრთელებულის პლაზმა ავადმყოფს გადაესხას, თორემ ტექნოლოგიურად ეს ძალიან რთული და ფაქიზი საკითხია.
პირველ რიგში, უნდა შეირჩეს ისეთი დონორი, რომელსაც მაღალი კონცენტრაციით აქვს დამცავი ანტისხეულები სისხლში, მეორე, ეს დონორი უნდა იყოს აბსოლუტურად ჯანმრთელი, მესამე, უნდა არსებობდეს სისხლის ჯგუფებს შორის შესაბამისობა…
ამ სირთულის გამოა, რომ მთელს მსოფლიოში, ეს თავისთავად ძალიან ეფექტური და იმედისმომცემი მეთოდი ვერსად ჰპოვებს მასობრივ გამოყენებას. ყველა ქვეყანაში მხოლოდ ერთეული ან ათეული შემთხვევაა და ესეც მაშინ ხდება, როცა სხვა მედიკამენტური მკურნალობა ეფექტური არაა. ჩვენ ამისთვის ვემზადებით. შესაძლოა, რამდენიმე დღეში ან ერთ-ორ კვირაში ეს მეთოდი გამოვიყენოთ. ჩვენ გვყავს 111 გამოჯანმრთელებული. მათგან მაქსიმუმ 15 პროცენტის პლაზმა გამოდგება სამკურნალოდ. ამიტომ ამ მეთოდით მკურნალობას ვერ ექნება მასობრივი ხასიათი” – თენგიზ ცერცვაძე
