თერჯოლის მუნიციპალიტეტში ინფიცირებულთა რაოდენობა გაიზარდა

თერჯოლის მუნიციპალიტეტის სოფელ ღვანკითში კორონავირუსის ათ დადასტურებულ შემთხვევას ორი სავარაუდო დადებითი დაემატა.
ეპიდემიოლოგები მუშაობას რამდენიმე საათში განაახლებენ.
“ამ დროისთვის სოფელში თერმოსკრინიგი 723 ადამიანს ჩაუტარდა, საიდანაც რამდენიმეს აღმოაჩნდა საეჭვო სიმპტომები, შესაბამისად, ჩვენმა ეპიდემიოლოგებმა აიღეს ანალიზები და გვაქვს კიდევ ორი სავარაუდო დადებითი შედეგი. თერმოსკრინინგი გაგრძელდება იქამდე, ვიდრე არ მოხდება სოფლის სრულად შესწავლა, ეს გაგრძელდება სავარაუდოდ, ორი დღე. ყველა ბლოკ-საგუშაგო განაგრძობს ფუნქციონირებას და ასე იქნება იქამდე, ვიდრე სოფელში რისკის დონე არ იქნება ნულამდე დასული. რაც შეეხება სასურსათო მაღაზიებს, სამივე მაღაზია რამდენიმე საათში დაიწყებს მუშაობას, მათ მიეწოდებათ სასურსათო მარაგი, ასევე გაიხსნება აფთიაქი, რომელიც უზრუნველყოფილი იქნება ყველა საჭირო მედიკამენტით, რომელიც შეიძლება იყოს პირველადი მოხმარების ჩვენი მოსახლეობისთვის”, – განაცხადა ზვიად შალამბერიძემ.
თერჯოლის მუნიციპალიტეტის სოფელი ღვანკითი 23 აპრილის 06:00 საათიდან ჩაიკეტა.
“რამდენიმე საათში სოფელ ღვანკითში სამივე მაღაზიაში შევიტანთ სასურსათო პროდუქტს, აფთიაქშიც დისტრიბუცია შეიტანს ყველა იმ მედიკამენტს, რომელიც ესაჭიროება მოსახლეობას. ჩვენი წარმომადგენელი არის კავშირზე ყველა ადგილობრივთან და საჭიროების შემთხვევაში, ყველა პრობლემას აღმოვფხვრით. იმისთვის, რომ მოსახლეობას ფულთან არ ჰქონოდა შეხება და ვირუსის კიდევ უფრო გავრცელება არ მოხდეს, სახელმწიფო რწმუნებულის ჩართულობით საბანკო სექტორის წარმომადგენლებთან გვქონდა მოლაპარაკება და დღეიდან ღვანკითში სასურსათო მაღაზიებში საბანკო ტერმინალები ამოქმედდება, რომ ტერმინალით გადახდა იყოს შესაძლებელი”, – განაცხადა თერჯოლის მუნიციპალიტეტის მერის მოვალეობის შემსრულებელმა ლაშა გოგიაშვილმა.
სოფელ ღვანკითში 705 ოჯახი – 2, 438 ადამიანი ცხოვრობს.