მაღალმთიან აჭარაში გზების გაწმენდითი სამუშაოები ინტენსიურ რეჟიმში მიმდინარეობს

ხულოს, შუახევის, ქედის, ხელვაჩაურისა და ქობულეთის მუნიციპალიტეტებში ადგილობრივი მნიშვნელობის საავტომობილო გზებზე თოვლის გაწმენდითი სამუშაოები ინტენსიურად მიმდინარეობს. ამის შესახებ ინფორმაციას აჭარის მთავრობის პრესსამსახური ავრცელებს.

მათივე ინფორმაციით, ამ დროისათვის მაღალმთიან სოფლებში თოვლის საფარი 50-60 სანტიმეტრს აღწევს და ადმინისტრაციულ ერთეულებთან მისასვლელი ყველა საავტომობილო გზა გაწმენდილია. ამ ეტაპზე ხორციელდება სოფლების შიდა გზების გაწმენდითი სამუშაოები, მაღალი გამავლობის ავტომობილების გადაადგილება შეზღუდული არ არის.

“ხულოს მუნიციპალიტეტში აჭარის საავტომობილო გზების დეპარტამენტის 14 ერთეული ტექნიკა ახორციელებს გაწმენდით სამუშაოებს, შუახევის მუნიციპალიტეტში-13 ერთეული, ქედის მუნიციპალიტეტში-6 ერთეული, ხოლო ხელვაჩაურის მუნიციპალიტეტში-7 ერთეული ტექნიკა. ქობულეთში ამ დროისთვის თოვლის გაწმენდითი სამუშაოები ორ ლოკაციაზე მიმდინარეობს“, – ნათქვამია ინფორმაციაში.