ხელვაჩაურში, სოფელ შარაბიძეებში იარაღის უკანონო შეძენა-შენახვის ბრალდებით დაკავებულის ახლობლების მიერ გამართულ აქციაზე 3 პირი დააკავეს
ხელვაჩაურში, სოფელ შარაბიძეებში იარაღის უკანონო შეძენა-შენახვის ბრალდებით დაკავებული 54 წლის რევაზ შარაბიძის ოჯახის წევრებმა და ნათესავებმა საპროტესტო აქცია გამართეს.
აქციის მონაწილეების განცხადებით, გუშინ რევაზ შარაბიძე უკანონოდ დააკავეს, რომელსაც იარაღი სამართალდამცავებმა ჩაუდეს.
აქციის მონაწილეების თქმით, დაკავებულის გათავისუფლების მოთხოვნით აქციებს კვლავ გამართავენ.
დღევანდელ აქციაზე კი სამართალდამცავებმა ადმინისტრაციული სამართალდარღვევის ფაქტზე სამი პირი დააკავა, მათ სამართალდამცავებს წინააღმდეგობა გაუწიეს.
„გუშინ, ღამის ორ საათზე, იარაღის უკანონო შეძენა-შენახვისთვის რევაზ შარაბიძე დააკავეს. ნათესავები, ახლობლები, მეგობრები სწორედ ამ უკანონო დაკავებას აპროტესტებენ, რადგან, როგორც ამბობენ, ის არის ჩადებული, მას არ ეკუთვნოდა იარაღი. სწორედ ამ მიზნით გაიმართა დღეს აქცია. პროტესტი რომ მასშტაბური არ გამხდარიყო, რამდენიმე მოქალაქე დააკავეს ადმინისტრაციული წესით.
პოლიცია, რომელიც ხელს უნდა უწყობდეს მოქალაქეებს მშვიდობიანი პროტესტის გამოხატვაში, პირიქით, ხელს უშლის და აკავებს, რაც ერთგვარად დაშინებას ნიშნავს.
დაკავებულს შევხვდი, ჩემი იარაღი არ არისო აცხადებს. აღსანიშნავია, რომ სახლში არ არის ამოღებული, არამედ მიმდებარე ტერიტორიაზე.
დღევანდელ დღეს დაკავებულებს ჯერ არ შევხვედრივარ. ისინი დააკავეს წვრილმანი ხულიგნობისთვის, რაც ასევე უსაფუძვლო და უკანონოა. ხულიგნობას, ადგილი არ ჰქონია. ამას მოქალაქეები ადასტურებენ.
მშვიდობიანი აქცია იყო, მაგრამ ეს დაშინების მიზნით მოხდა”,- აცხადებს ადვოკატი ზაზა პაპიძე.
