მიკროსაფინანსო ორგანიზაციაზე თავდასხმის საქმეზე ბრალდებულმა ლევან ზურაბაშვილმა ნაფიც მსაჯულთა სასამართლოზე უარი თქვა
მიკროსაფინანსო ორგანიზაციაზე თავდასხმის საქმეზე, მძევლად ხელში ჩაგდების ბრალდებით დაკავებულმა ლევან ზურაბაშვილმა ნაფიც მსაჯულთა სასამართლოს მიერ მისი საქმის განხილვაზე უარი განაცხადა.
აღნიშნულის შესახებ „ინტერპრესნიუსს“ ზურაბაშვილის ადვოკატმა გიორგი ჩოჩუამ განუცხადა.
დღევანდელ სასამართლო პროცესზე, რომელიც თბილისის საქალაქო სასამართლოში გაიმართა, ასევე გადაისინჯა დაკავებულის მიმართ შეფარდებული აღკვეთის ღონისძიება პატიმრობა და ის კვლავ ძალაში დარჩა.
„საქმის მასალები არსებით განხილვის სხდომას გადაეცა, ნაფიც მსაჯულებზე თავად ბრალდებულმა განაცხადა უარი, თქვა, რომ ასე უნდოდა და ეს მისი უფლებაა. თუმცა, ჩვენი სტრატეგია სხვა იყო და სამართლებრივად, ტაქტიკურად ნაფიც მსაჯულთა სასამართლო სჯობდა, მაგრამ მან ასე გადაწყვიტა, რისი უფლებაც აქვს. ზურაბაშვილი აცხადებს, რომ მას არავისთვის ზიანი არ მიუყენებია, არავის ფიზიკურად არ შეხებია და არც არავის ემქურებოდა მისგან საფრთხე. შესაბამისად, ის თავს უდანაშაულოდ მიიჩნევს, მისი მოთხოვნები აზარტული თამაშების აკრძალვასთან დაკავშირებით, კვლავ ძალაშია“, – აცხადებს ჩოჩუა.
ცნობისთვის, წერეთლის გამზირზე მდებარე მიკროსაფინანსო ორგანიზაციაში 31 წლის დავით ზურაბაშვილი შეიჭრა და 19 ადამიანი მძევლად აიყვანა. თავდამსხმელთან სამართალდამცავების მიერ რამდენიმესაათიანი მოლაპარაკებების შედეგად, ბრალდებულმა მძევლად აყვანილი ადამიანები ეტაპობრივად გაათავისუფლა. დავით ზურაბაშვილს საქართველოს პროკურატურამ ბრალი საქართველოს სსკ-ის 144-ე მუხლის მეორე ნაწილის „გ“ ქვეპუნქტით წარუდგინა, რაც გულისხმობს ორი ან მეტი პირის მძევლად ხელში ჩაგდებას.
