პარლამენტთან გიორგი რურუას გათავისუფლების მოთხოვნით აქცია მიმდინარეობს
პარლამენტის შენობასთან, ზუბალაშვილების ქუჩის მხრიდან, პატიმარ გიორგი რურუას მხარდამჭერები და სამოქალაქო მოძრაობა „სირცხვილია” აქციას მართავენ. აქციის მონაწილეებს პლაკატები წარწერით „თავისუფლება გიორგი რურუას” და „გიორგი რურუა პოლიტპატიმარია” უჭირავთ. როგორც აქტივისტები აცხადებენ, მათი მთავარი მოთხოვნაა, ხელისუფლებასა და ოპოზიციას შორის დადებული 8 მარტის შეთანხმების სრულად შესრულება.
„პრინციპულად მნიშვნელოვანია 8 მარტის შეთანხმების სრულად შესრულება. „ქართული ოცნების” ხელისუფლებას აქვს შანსი, რომ საზოგადოების დაკვეთა ბოლომდე შეასრულოს და მიიღოს თითქმის პროპორციული არჩევნები, რისთვისაც ჩვენ ვიბრძოდით ერთი წლის განმავლობაში. ასევე, მათ აქვთ შანსი, სამოქალაქო საზოგადოებასთან და საერთაშორისო პარტნიორებთან დარჩეს სწორი და გაათავისუფლოს პოლიტიკური პატიმარი, გიორგი რურუა, რომელიც დღეს ოლიგარქის ტყვეობაში იმყოფება”,- განაცხადა მოძრაობა „სირცხვილიას“ აქტივისტმა ნოდარ რუხაძემ.
პარლამენტის მიმდებარე ტერიტორიაზე მიმდინარე აქციას შეუერთდება ასევე სამოქალაქო მოძრაობა „შეცვალე”.
interpressnews
